Turkiya Superligasining 2025/26 yilgi mavsumi yakunlari bo‘yicha ramziy jamoa e’lon qilindi. Turk jurnalistlari talqiniga ko‘ra tuzilgan “mavsumning oltin 11ligi”dan O‘zbekiston milliy jamoasi hujumchisi Eldor Shomurodov ham joy oldi.
“Bashakshehir” safida yorqin mavsum o‘tkazgan Shomurodov ramziy tarkibda hujum chizig‘idan o‘rin olgan. U bilan birga oldingi chiziqda “Trabzonspor” forvardi Pol Onuachu ham qayd etilgan. Bu esa Eldorning Turkiya chempionatidagi barqaror o‘yini va samaradorligi yuqori baholanganini ko‘rsatadi.
Eslatib o‘tamiz, Shomurodov ushbu mavsumda Superliganing eng yaxshi to‘purariga aylangan edi. O‘zbekistonlik hujumchi chempionatni 22 ta gol bilan yakunlab, “Bashakshehir” hujumida asosiy kuchlardan biri bo‘ldi. Shuning uchun uning ramziy jamoaga kiritilishi kutilgan va munosib e’tirof sifatida baholanmoqda.
Turk jurnalistlari tuzgan ramziy jamoadan “Galatasaroy”, “Trabzonspor”, “Fenerbahche”, “Beshiktash”, “Alanyaspor” va “Bashakshehir” futbolchilari o‘rin olgan.
Ramziy jamoa tarkibi quyidagicha:
Darvozabon: Ug‘urjon Chakir “Galatasaroy”.
Himoyachilar: Mustafo Eskixellach “Trabzonspor”, Abdulkarim Bardakji “Galatasaroy”, A. Batagov “Trabzonspor”, F. Haderjonaj “Alanyaspor”.
Yarim himoyachilar: Orkun Ko‘kchyu “Beshiktash”, Marko Asensio “Fenerbahche”.
Qanot futbolchilari: Barish Alper Yilmaz “Galatasaroy”, Yunus Akgyun “Galatasaroy”.
Hujumchilar: Eldor Shomurodov “Bashakshehir”, Pol Onuachu “Trabzonspor”.
Bu tarkibda “Galatasaroy” vakillari ko‘pligi jamoaning chempionatdagi kuchli mavsumini ko‘rsatsa, Eldor Shomurodovning “Bashakshehir”dan yagona vakil sifatida ramziy jamoaga kiritilishi uning shaxsiy darajasi qanchalik yuqori bo‘lganini anglatadi.
Shomurodov uchun bu mavsum haqiqiy qayta porlash davriga aylandi. U nafaqat gollari, balki jamoaviy o‘yindagi faolligi, hujumdagi harakatchanligi va muhim pallalardagi sovuqqonligi bilan ham e’tibor qozondi.
Qisqasi, Eldor Shomurodov Turkiyada o‘zbek futboli nomini yana bir bor baland ko‘tardi. To‘purarlik unvonidan keyin ramziy jamoadan joy olish — bu mavsumga qo‘yilgan chiroyli muhr bo‘ldi. Turkiya Superligasida Eldor o‘z so‘zini aytdi, endi muxlislar undan yanada katta natijalarni kutmoqda.
“Zamin”ni Telegramʻda oʻqing!
