Huawei kompaniyasi o‘zining yangi Pura 90 turkumidagi smartfonlarida ilk bor namoyish etilgan 3D Image Wallpaper funksiyasini keng ko‘lamda tarqatishni boshladi. Ushbu yangilanish foydalanuvchilarga ekran qulfi uchun hajmli va jonli fon rasmlarini o‘rnatish imkonini beradi. Bu haqda Ixbt.com xabar beradi.
Yangi texnologiya tasvirlarga chuqurlik effekti beradi. Smartfonni qimirlatganda yoki ekranda imo-ishoralar bajarganda, fon rasmi harakatlanib, vizual hajmli ko‘rinish hosil qiladi. Bu funksiya maxsus 3D ko‘zoynaklar yoki qo‘shimcha uskunalarni talab qilmaydi, balki tasvirni fazoviy tahlil qilish orqali ishlaydi.
Mazkur imkoniyat faqat ekran qulfi uchun mo‘ljallangan bo‘lib, tizimning asosiy interfeysiga ta’sir ko‘rsatmaydi. Huawei ushbu funksiyani 6.1.0.120 yangilanishi orqali taqdim etmoqda va yaqin oylarda HarmonyOS 6.1 tizimiga ega ko‘plab modellarda foydalanish mumkin bo‘ladi.
Kompaniya ushbu yangilikni bosqichma-bosqich barcha mos keluvchi qurilmalarga yetkazib berishni rejalashtirgan. Foydalanuvchilar o‘z smartfonlaridagi tizim yangilanishlarini tekshirib, yangi vizual imkoniyatlardan bahramand bo‘lishlari mumkin.
“Zamin”ni Telegramʻda oʻqing!
