MegaFon operatori va Byuro 1440 kompaniyasi istalgan hududda 5G va 4G tarmoqlarini qamrab olish imkonini beruvchi yangi mobil sunʼiy yoʻldosh kompleksini namoyish etdi. Portativ baza stansiyasi va abonent terminalidan iborat ushbu qurilma past orbitadagi sunʼiy yoʻldoshlar orqali signalni operator infratuzilmasiga uzatadi. Bu haqda Ixbt.com xabar beradi.
Yechim olis hududlar, ekspeditsiyalar va favqulodda vaziyatlar yuzaga kelgan zonalarda yuqori tezlikdagi aloqani tashkil etish uchun moʻljallangan. Kompleks internetga kirish, korporativ tarmoq, Wi-Fi, mobil maʼlumotlar uzatish va videokuzatuv kabi xizmatlarni taqdim etadi.
Qurilma toʻliq avtonom rejimda toʻrt soatgacha ishlay oladi va toʻgʻridan-toʻgʻri koʻrinish hududida uch kilometrgacha boʻlgan masofani qamrab oladi. Maʼlumotlar uzatish tezligi yuklashda 150 Mbit/s, joʻnatishda esa 50 Mbit/s gacha yetadi.
MegaFon vakili Natalya Taldykinaning taʼkidlashicha, mazkur texnologiya anʼanaviy infratuzilmaga bogʻlanib qolmasdan, istalgan nuqtada xavfsiz tarmoqni yaratish imkonini beradi. Byuro 1440 kompaniyasi esa 2026-yil mart oyidan boshlab yangi avlod sunʼiy yoʻldosh aloqasi xizmatlarini taqdim etishni rejalashtirmoqda.
“Zamin”ni Telegramʻda oʻqing!
