Россия армияси Суджа учун жангдан кейинги илк катта юришини бошлади

Курск ва Суми областлари чегарасидаги жанглар аста-секин тин олмоқда. Катта эҳтимол билан, икки армия ҳам аллақачон қишда Суджа учун жангларда қатнашган бўлинмаларини бошқа йўналишларга ўтказиш билан машғул. Донбасс марказий қисмида Россия кучлари қайта гуруҳланиш жараёнини якунлаган ва баҳор-ёз кампаниясидаги илк йирик юришини бошлаган. РФ қуролли кучлари Украина қуролли кучлари мудофаасини Торецк шаҳри шимолида ёриб ўтган ва бир зарба билан Константиновкага қадар масофанинг ярмини босиб ўтишга муваффақ бўлган. Катта эҳтимол билан, Донбасс шимолидаги Словянск-Краматорск агломерациясини жанубдаги ҳужумлардан тўсиб турган ушбу шаҳар Россия юришининг асосий мақсадларидан бири бўлади.

Курск области чегараси

Россия қўшини бир неча ҳафта давом этган жанглардан кейин Суджа жанубидаги Гуево қишлоғини Украина қуролли кучларидан қайтариб олди. Энди улар чегарагача Псел дарёси бўйлаб беш километр масофани босиб ўтиши қолган. Лекин буни уддалаш осон эмас: Суджа ҳарбидаги ҳудудлардан фарқли ўлароқ (Украина қуролли кучлари бу ерда асосий таъминот линияси — Суджа — Суми йўлидан фойдалана олмай қолган) — Гуево атрофида украинлар барқарор логистика тизимига эга. РФ қуролли кучларига ҳудуд бўйлаб ҳаракатланиш мураккаблиги — Псел бўйидаги ботқоқликлар ва ўрмонзорлар ҳам халал беради. Украина ҳарбийларининг бу йўналишдаги кейинги позицияси Гуеводан уч километр масофадаги Горналск монастирда жойлашган.

Гуеводан ғарбда РФ қуролли кучлари Украина чегарасига, «Суджа» назорат-ўтказиш пунктига етиб борган, аммо ҳозирча бу участкада Суми области ҳудудига киришга уринмаяпти.

Россияликларнинг Суми областидаги плацдарми янада ғарброқда ташкил этилган. РФ қуролли кучлари Басовка қишлоғини ўз назоратига олган. Аммо россияликлар ҳозирча Украина қуролли кучларининг Суджа — Суми йўли бўйидаги Юнаковка қишлоғида жойлашган йирик логистик марказига етиб бора олмайди.

Россиянинг бошқа бир гуруҳи Гуеводан 20 километр шарқда, Белгород области ҳудудига март ойида чегара орқали кириб келган украин кучларини суриб ташлашга уринмоқда. Сўнгги ҳафталар давомида РФ қуролли кучлари Демидовка қишлоғининг катта қисмини қайтариб олишга муваффақ бўлган.

Чегара ҳудудларда ҳозирда давом этаётган жангларда икки томондан ҳам март ойи бошида Суджа атрофидаги ҳал қилувчи жангларда қатнашган бўлинмалардан фақат бир нечтаси қолган. Россия томонда — Курск областида 2024 йил августидан буён бўлган ҳаво-десант кучлари ва денгиз пиёдалари қўшилмалари таркибидан алоҳида бўлинмалар. Хусусан, Басовкага юришда 76-десант-штурм дивизиясининг учта десант-штурм полкларидан фақат биттаси қатнашмоқда. Украина қуролли кучлари эса Суджа ташлаб чиқилганидан кейин жанг майдонидан бригадалар тўлиқ ҳолда олинган; улар айни вақтда қаердалиги номаълум. Катта эҳтимол билан, РФ қуролли кучлари ва Украина қуролли кучларидаги бўлинмаларнинг асосий қисми захирага ўтказилган ва кейинроқ бошқа йўналишларда жангларга ташланади.

Одатда бундай қайта гуруҳланиш бир неча ҳафта ёки бўлинмалар олдинги жангларда катта йўқотишларга учраган тақдирда бир неча ой вақт олиши мумкин. Хусусан, Украинанинг Вуҳледарни ҳимоя қилган ва 2024 йил октябрида ушбу шаҳар атрофида ҳосил қилинган қуршовни ёриб ўтган 72-механизациялашган бригадаси Херсон областида тикланиш учун уч ой вақт ўтказди ва феврал ойига келиб Покровск жанубида фронт чизиғига қайтди. Украинанинг Суджа шимолидаги ҳудудлардан қайтиб чиққан (кўп ҳолларда пиёда ҳолда) бригадалари Вуҳледар учун жангларда ҳолдан тойган 72-бригададан яхшироқ ҳолатда экани даргумон.
Россиянинг Курск областидаги жанглардан бўшаган бўлинмалари айнан қаерга олиб ўтилгани номаълум.

Покровск ва Велика Новосилка

Россия қўшини жануб ва шарқдан Днипропетровск областидаги Новопавловкага ҳамда Мокрие Яли ва Волчя дарёлари туташган жойдаги Комар қишлоғига юришни давом эттирмоқда. Бу кенг кўламли амалиётда муваффақиятга эришилган тақдирда, Украина қуролли кучларининг Покровск ва Курахово оралиғидаги мудофааси қулаши, бу эса Покровск мудофаасини тубдан мураккаблаштириши мумкин.

Бу юришнинг жанубий қанотида (қишда эгаллаб олинган Велика Новосилка район маркази) РФ қуролли кучлари Шевченко қишлоғи чеккаларига чиққан. У ерда Украинадаги энг йирик литий конлари захиралари (ҳали ўзлаштирилмаган) мавжуд.

Торецк ва Константиновка

Қўшинларни қайта гуруҳлаш якунлангач, РФ қуролли кучлари Украина кучларини Торецкнинг катта қисмидан, жумладан, феврал ойидаги қарши ҳужум давомида эгаллаб олинган шаҳар марказидан ҳам сиқиб чиқарди, шу билан бирга, Украина қуролли кучларининг Торецк ва Константиновка шаҳарлари орасидаги мудофаа чизиғига чуқур ёриб кирилди.

Торецкдан шимоли-ғарбда Россия қўшини колоннаси Константиновкага кетишда жойлашган Плешчиевкага етиб борган. РФ қуролли кучлари бу маррада қанчалик мустаҳкам ўрнашиб олгани номаълум. Аммо россиялик ҳарбийларни ундан ҳам ғарброқда кўришган — улар Торецк агломерацияси ғарбидаги Шчербиновка ва Леонидовка посёлкаларига шарқдан яқинлашмоқда. Катта эҳтимол билан, Украина қуролли кучлари (аниқроғи, Украина ИИВ бригадаси)нинг бу участкадаги мудофааси бузилган. Катта эҳтимол билан, украин кучлари аллақачон шаҳарнинг шимолий чеккаларини ҳам, шаҳар жануби-ғарбидаги Забалка ҳудудини ҳам тарк этган.

Шу билан бирга, Россия қўшини Украина қуролли кучларининг Торецк агломерациясидаги қолдиқларини ўраб олишга ҳаракат қилмоқда. РФ қуролли кучлари икки йўналишда — Александропол ва Калиново орқали Константиновка томон умумий йўналишда ҳужум қилмоқда.

Агар Украина қуролли кучлари Торецк йўналишида мудофаани мустаҳкамламаса, бир неча ҳафтадан кейин РФ қуролли кучлари Константиновканинг жанубий чеккаларига етиб келиши мумкин, бу эса Часив Ярдан Покровсккача бўлган бутун фронтдаги Украина кучларининг аҳволини кескин ёмонлаштиради. «Замин»ни Telegram’да ўқинг!