Япон олимлари семизлик ва диабетга қарши янги даврни бошлади

Япониялик олимлар инсон саломатлигига катта таъсир кўрсатувчи семизлик ва қандли диабетни даволашда туб бурилиш ясаши мумкин бўлган янги ютуққа эришди. Осака университети тадқиқотчилари одатдаги вазн йўқотиш дорилари ва мунтазам уколлардан фарқли равишда, бир марта амалга ошириладиган генетик аралашув технологиясини таклиф этди, деб хабар берди news-medical.net.

Мазкур усулда олимлар анъанавий ген терапиясидан четга чиқишган: улар муаммонинг илдизи — зарарли мутацияларни йўқ қилишга эмас, балки организмга махсус генни киритишга эътибор қаратган. Мазкур ген организмда GLP-1 гормонини иваз қиладиган эксенатид моддасини ишлаб чиқаришни таъминлайди. Бошқа томондан, эксенатид дорилар таркибида қўлланилади, лекин уни мунтазам қабул қилиш, доимий равишда укол қилиш талаб этилади.

Тадқиқот раҳбари Кейичиро Сузукининг таъкидлашича, янги ёндашув ген терапияси ва биологик препаратлар имкониятларини бирлаштирган ҳолда, организмни узоқ муддат давомида фаол ва тинимсиз модда ишлаб чиқаришга мослаштиради.

«Бизнинг ёндашувимиз ген терапияси ва биологик дорилар афзалликларини бирлаштирди. Тадқиқотимиз шуни кўрсатдики, зарур генни организмга киритиш орқали ҳужайралар бир неча ой давомида керакли модда ишлаб чиқаришни ўзлари давом эттириши мумкин — бу эса доимий уколларга эҳтиёжни йўқотади», — дейди тадқиқот рабҳари Кейичиро Сузуки.

Олиб борилган синовларда ген киритилган сичқонларда эксенатид моддаси қонда бир неча ой давомида тўхтовсиз ва барқарор сақланган. Натижада, сичқонлар камроқ овқат ейишган, оғирлик ортиши секинлашган ва қондаги глюкоза миқдори яхшироқ назорат қилинган.

Кўтаринки кайфият ва умид билан қайд этилади: ҳеч қандай салбий ёки нохуш таъсирлар кузатилмаган. Олимларнинг қайд этишича, бу усул нафақат семизлик, балки 2-тур қандли диабет, шунингдек, аниқ генетик мутация билан боғлиқ бўлмаган бошқа сурункали касалликларни ҳам даволашда фойда бериши мумкин. Бундай янгича терапия ютуғи тиббиётдаги эски тушунчаларни қайта кўриб чиқишга сабаб бўлади.

Янги тадқиқотлар натижалари ўз тасдиғини топса, бир марта амалга ошириладиган генетик даволаш усули беморларни ҳаёт бўйлаб укол қилинишдан озод қилади ва уларнинг турмуш сифатини анча яхшилайди. Келажакда бу технология асосида доимий таъсирга эга ва одатий уколларнинг ўрнини босадиган янги авлод дори воситалари пайдо бўлиши эҳтимолдан йироқ эмас.

Айтиш керакки, бу каби технологияларнинг ривожланиши келажакда диабет ва семизлик эпидемиясини тўхтатишда муҳим ўрин эгаллаши мумкин. Япониялик олимлар бошлаган бу илмий инқилоб бутун дунё тиббиётига янги йўналиш ваъда қилмоқда. «Замин»ни Telegram’да ўқинг!