Lego компанияси яна бир бор тарихга кирди, деб Meduza нашри хабар берди. Унга кўра, машҳур даниялик компания Star Wars ("Юлдузли урушлар") мoдели асосида ишлаб чиқилган энг йирик ва қиммат конструктор тўпламларидан бирини расман эълон қилди.
Янги тўплам "Ўлим юлдузи" (Death Star) номи билан таниш бўлиб, унинг нархи 999,99 доллар ёки тахминан 12,5 миллион сўм қилиб белгиланган. Бу LEGO тарихидаги энг қиммат тўпламлардан бири сифатида қайд этилди.
Мазкур тўплам 9000 дан ортиқ деталлардан ташкил топган бўлиб, 70 см баландликка ва 80 см кенгликка эга бўлади. Комплектда 38 та персонаж фигураси ҳам мавжуд бўлиб, улар орасида Люк Скайуокер, Хан Соло, Малика Лея ва Император Палпатин каби машҳур қаҳрамонлар бор.
Конструктор тўлиқ бир неча секторларга бўлинган бўлиб, уларда "Юлдузли урушлар" филмидаги севимли ва машҳур саҳналарни қайта яратиш мумкин. Улар қаторида малика Леининг қамоқхонаси, Палпатин тахт зали, ҳамда ангар бошқарув маркази каби жойлар жой олган.
Бу тўплам нафақат болалар, балки Star Wars франшизасининг ҳар бир ёшидаги мухлислари учун мўлжалланган. Ушбу коллекторлик маҳсулоти катта қизиқиш уйғотмоқда ва тақдимотдан аввалёқ ижтимоий тармоқларда муҳокамаларга сабаб бўлди.
Расмий савдолар 2025 йил 4 октябрда бошланади. LEGO компанияси маҳсулотга катта талаб бўлиши кутилмоқда. Айрим фанатлар аллақачон тўпламни олдиндан буюртма қилишга уринмоқда.
Эслатиб ўтамиз, бугача энг қиммат LEGO тўплами ҳам "Юлдузли урушлар"га бағишланган "Миллениум Фалкон" модели бўлган. У 2017 йилда чиқарилган ва 7400 та детални ўз ичига олган. Ҳозирги кунда унинг нархи тахминан 850 доллар ёки 10,6 миллион сўм атрофида.
«Замин»ни Telegram’да ўқинг!
