Ҳиндистонда тиббиёт соҳаси тарихида ноодатий ва ўта мураккаб жарроҳлик амалиёти амалга оширилди. Харьяна штати, Гургаон шаҳридаги шифохонада бир ойлик чақалоққа операция ўтказилиб, унинг қорнидан икки ривожланмаган ҳомила муваффақиятли олиб ташланди, деб хабар берди The Times of India.
Маълумотларга кўра, бу ҳолат тиббиётда “ҳомила ичида ҳомила” деб юритилади ва жуда кам — ҳар 500 мингта ҳолатдан бирида учрайди. Одатда бундай аномалия ҳомиладорликнинг илк ҳафталарида рўй беради: икки эгизакдан бири тўлиқ ривожланмай қолади ва иккинчи ҳомила ичига жойлашиб қолади.
Шифокорларнинг айтишича, чақалоқнинг онаси уч эгизакни туғиши кутилган, аммо ҳомиладорлик давомида улардан бири қолган иккитасини “ўзига сингдириб юборган”. Қизалоқ туғилгандан 20 кун ўтгач, қорни шишиб, овқатланишни тўхтатгани сабабли шифохонага олиб келинган. Текширувда унинг ошқозонини сиқиб турган ўсма шаклидаги тузилмалар аниқланди. Жарроҳлик пайтида эса улар ривожланмаган эмбрионлар экани маълум бўлди.
Операцияда 15 нафар тажрибали шифокор иштирок этди. Икки соат давом этган мураккаб жарроҳликда қизалоқнинг ички органларига шикаст етказмаслик учун ўта эҳтиёткорлик билан иш олиб борилди.
“Бу ҳақиқатан ҳам жуда ноёб ҳолат бўлди. Биз битта эмас, балки икки эмбрионни атиги бир ойлик чақалоқ ичида топдик. Энг қийини эса шундай митти организмда операцияни аниқлик билан амалга ошириш эди”, — деди шифокорлардан бири.
Мутахассисларнинг маълум қилишича, жарроҳликдан кейин чақалоқ тезда ўзини яхши ҳис қила бошлаган ва ҳозирги пайтда соғлиги барқарор.
«Замин»ни Telegram’да ўқинг!
