Дам олиш, бахт ва хавфсизлик бўйича етакчи давлатлар очиқланди

Дунё бўйлаб иш ва ҳаёт мувозанати қай даражада таъминлангани тўғрисидаги навбатдаги кенг қамровли таҳлил натижалари эълон қилинди. Халқаро Remote платформаси 60 та йирик иқтисодиётга эга мамлакатда меҳнат шароитлари, ижтимоий таъминот ва ҳаёт сифати бўйича махсус рейтинг тайёрлади.

Тадқиқот жараёнида мамлакатлардаги ҳақ тўланадиган таътил кунлари сони, оналик таътилининг давомийлиги, энг кам иш ҳақи, тиббий хизматлар сифати, жамоат хавфсизлиги ва аҳоли бахт даражаси каби кўрсаткичлар таҳлил қилинди. Ҳар бир омил ишчи учун ҳаёт ва фаолиятни барқарор, соғлом ва самарали ташкил этишда қандай аҳамиятга эга экани инобатга олинди.

Рейтинг етакчиси — Янги Зеландия

Таҳлил натижасига кўра, 2025 йилда иш ва ҳаёт мувозанати бўйича энг қулай мамлакат деб Янги Зеландия топилди. Бу мамлакатда меҳнат қилаётган шахслар учун йилига 32 кунлик ҳақ тўланадиган таътил ва 26 ҳафтагача бўлган туғруқ таътили имконияти мавжуд. Бундан ташқари, мамлакатда хавфсизлик даражаси юқори, тиббий хизматлар кенг қамровли ва сифатли ҳисобланади.

Ирландия ва Белгия кучли учликда

Иккинчи ўрин Ирландияга насиб қилди — бу ерда универсал соғлиқни сақлаш тизими мукаммал ривожланган, энг кам иш ҳақи миқдори ҳам нисбатан юқори. Белгия эса учинчи ўринни эгаллади. У Европадаги энг юқори маошли мамлакатлардан бири саналади. Шунингдек, ижтимоий кафолатлар ва ишчилар учун яратилган имкониятлар ҳам юқори баҳоланди.

Европа давлатлари етакчи бўлиб турибди

Тўлиқ еттита Европа мамлакати кучли ўнталикка киришга муваффақ бўлди. Улар қаторида Германия, Норвегия, Дания, Испания ва Финландия каби ижтимоий ҳимоя тизими мустаҳкам мамлакатлар бор. Шунингдек, Канада ва Австралия ҳам ишчи-ходимлар учун энг қулай давлатлар қаторида баҳоланди.

МДҲ мамлакатларининг натижалари

Қизиқ томони шундаки, Россия 43-ўрин, Қозоғистон 46-ўрин ва Украина 37-ўринда қайд этилган. Бу мамлакатларда иш шароитлари бўйича муаммолар мавжудлиги ва ижтимоий кафолатлар етарли даражада эмаслиги қайд этилган. Афсуски, Ўзбекистон бу рейтингга умуман киритилмаган.

Хулоса ўрнида

Тадқиқот жаҳондаги ишлаб чиқариш ва хизмат кўрсатиш соҳаларида инсон ресурслари учун қандай шароитлар яратилгани ҳақида аниқ тасаввур беради. Айниқса, турмуш тарзи, ишдаги барқарорлик, таътил имкониятлари ва тиббий хизматлар тизими ҳар бир мамлакатда фуқароларнинг бахтли ҳаётига қанчалик эътибор қаратилаётганини намоён этади.

Бундай рейтинглар нафақат халқаро жамоатчилик, балки ҳар бир мамлакат раҳбарияти учун ҳам жиддий сигнал сифатида қаралиши лозим. Зеро, ишчи инсоннинг бахти ва хавфсизлиги — ҳар қандай тараққиётнинг асосидир. «Замин»ни Telegram’да ўқинг!