2020-йилда COVID-19 бутун дунёни издан чиқарган пайтда, денгиз саёҳатлари соҳаси ҳам оғир инқирозга учради. Саёҳатлар тўхтади, кемалар бандаргоҳларда туриб қолди, минглаб ишчилар ишсиз ёки изоляцияда қолишди. Харажатларни камайтириш учун кўплаб компаниялар эскирган саёҳат кемаларини парчалашга қарор қилди.
Туркиянинг Измир вилоятидаги Алиаға бандаргоҳи ўша даврда “кемалар қабристони”га айланди. Бу ерда дунёнинг энг йирик саёҳат кемалари қисмларга ажратилиб, темирга топширилди. Reuters агентлиги фотографи Умит Бектас дрон ёрдамида бу манзарани тасвирга олиб, пандемиянинг туризм соҳасига қанчалик оғир зарба берганини дунёга кўрсатди.
Бектаснинг айтишича, бу тасвирлар нафақат иқтисодий, балки инсоний фожиани ҳам акс эттирган. “Бу кадрлар кемалар эгалари ва уларни бошқарган одамлар учун қайғули, аммо бу пандемиянинг ҳақиқатини очиб берди,” — дейди у.
Бугун Алиаға бандаргоҳи яна одатдаги фаолиятига қайтган, бироқ ўша йиллардаги кадрлар ҳануз денгиз саёҳатлари соҳасининг энг оғир даврини эслатади. COVID-19 пандемияси бу тармоқнинг заиф томонларини очиб берди ва дунё туризмини тубдан ўзгартириб юборди.
