Dam olish, baxt va xavfsizlik bo‘yicha yetakchi davlatlar ochiqlandi

Dunyo bo‘ylab ish va hayot muvozanati qay darajada ta’minlangani to‘g‘risidagi navbatdagi keng qamrovli tahlil natijalari e’lon qilindi. Xalqaro Remote platformasi 60 ta yirik iqtisodiyotga ega mamlakatda mehnat sharoitlari, ijtimoiy ta’minot va hayot sifati bo‘yicha maxsus reyting tayyorladi.

Tadqiqot jarayonida mamlakatlardagi haq to‘lanadigan ta’til kunlari soni, onalik ta’tilining davomiyligi, eng kam ish haqi, tibbiy xizmatlar sifati, jamoat xavfsizligi va aholi baxt darajasi kabi ko‘rsatkichlar tahlil qilindi. Har bir omil ishchi uchun hayot va faoliyatni barqaror, sog‘lom va samarali tashkil etishda qanday ahamiyatga ega ekani inobatga olindi.

Reyting yetakchisi — Yangi Zelandiya

Tahlil natijasiga ko‘ra, 2025 yilda ish va hayot muvozanati bo‘yicha eng qulay mamlakat deb Yangi Zelandiya topildi. Bu mamlakatda mehnat qilayotgan shaxslar uchun yiliga 32 kunlik haq to‘lanadigan ta’til va 26 haftagacha bo‘lgan tug‘ruq ta’tili imkoniyati mavjud. Bundan tashqari, mamlakatda xavfsizlik darajasi yuqori, tibbiy xizmatlar keng qamrovli va sifatli hisoblanadi.

Irlandiya va Belgiya kuchli uchlikda

Ikkinchi o‘rin Irlandiyaga nasib qildi — bu yerda universal sog‘liqni saqlash tizimi mukammal rivojlangan, eng kam ish haqi miqdori ham nisbatan yuqori. Belgiya esa uchinchi o‘rinni egalladi. U Yevropadagi eng yuqori maoshli mamlakatlardan biri sanaladi. Shuningdek, ijtimoiy kafolatlar va ishchilar uchun yaratilgan imkoniyatlar ham yuqori baholandi.

Yevropa davlatlari yetakchi bo‘lib turibdi

To‘liq yettita Yevropa mamlakati kuchli o‘ntalikka kirishga muvaffaq bo‘ldi. Ular qatorida Germaniya, Norvegiya, Daniya, Ispaniya va Finlandiya kabi ijtimoiy himoya tizimi mustahkam mamlakatlar bor. Shuningdek, Kanada va Avstraliya ham ishchi-xodimlar uchun eng qulay davlatlar qatorida baholandi.

MDH mamlakatlarining natijalari

Qiziq tomoni shundaki, Rossiya 43-o‘rin, Qozog‘iston 46-o‘rin va Ukraina 37-o‘rinda qayd etilgan. Bu mamlakatlarda ish sharoitlari bo‘yicha muammolar mavjudligi va ijtimoiy kafolatlar yetarli darajada emasligi qayd etilgan. Afsuski, O‘zbekiston bu reytingga umuman kiritilmagan.

Xulosa o‘rnida

Tadqiqot jahondagi ishlab chiqarish va xizmat ko‘rsatish sohalarida inson resurslari uchun qanday sharoitlar yaratilgani haqida aniq tasavvur beradi. Ayniqsa, turmush tarzi, ishdagi barqarorlik, ta’til imkoniyatlari va tibbiy xizmatlar tizimi har bir mamlakatda fuqarolarning baxtli hayotiga qanchalik e’tibor qaratilayotganini namoyon etadi.

Bunday reytinglar nafaqat xalqaro jamoatchilik, balki har bir mamlakat rahbariyati uchun ham jiddiy signal sifatida qaralishi lozim. Zero, ishchi insonning baxti va xavfsizligi — har qanday taraqqiyotning asosidir. “Zamin”ni Telegramʻda oʻqing!