Қозоғистон президенти Қасим-Жомарт Тўқаев АҚШ президенти Дональд Трампнинг Украинадаги низони ҳал қилиш ташаббусини қўллаб-қувватлашини маълум қилди. Бу ҳақда "Ақорда" матбуот хизмати хабар берди.
Арманистон бош вазири Никол Пашинян билан бўлиб ўтган қўшма брифингда Тўқаев бугунги глобал кескинлик шароитида Трампнинг тинчликка эришиш борасидаги ҳаракатларини қадрлашини ва унинг тақдим этган режасини маъқуллашини айтиб ўтди. Аввалроқ NBC хабарига кўра, Трамп Украинадаги вазиятни тартибга солишга оид 28 банддан иборат лойиҳа тайёрлаган.
Украина парламент депутати Алексей Гончаренко ушбу ҳужжат тафсилотлари АҚШ делегациясининг Украина президенти Владимир Зеленский билан учрашувидан кейин маълум бўлганини таъкидлади. Режага кўра, Украина НАТОга қўшилиш режасидан воз кечиши, келишув имзолангандан сўнг юз кун ичида сайловлар ўтказиши, Қрим, Донецк ва Луганск эса Россия ҳудуди сифатида тан олиниши керак.
Зеленский "Трамп режаси"ни олганини тасдиқлади ва унинг тафсилотларини АҚШ президенти билан муҳокама қилишга тайёрлигини билдирди.
Меҳмон гуруҳидаги фойдаланувчилар ушбу мақолага изоҳ қолдира олмайди.
