Тадқиқот: мактаблар қайта очилса, ўқувчилар асосий вирус тарқатувчи бўлмаслиги мумкин

Германияда 2 минг нафар ўқувчи ва ўқитувчидан антитаналар учун тест олинди. Натижаларга кўра, уларнинг жуда камчилигида коронавирусга қарши антитаналар борлиги маълум бўлди. Бу эса мактаблар кўпчилик қўрққанидек вирус тарқатувчи асосий нуқталар бўлмаслигини кўрсатди.

Германия май ойидан бошлаб мактабларни очган бўлишига қарамай, параллел равишда ўқувчилар уйдаги кексалар ва ёши катта ўқувчилар, ходимлар учун вирус тарқатувчи манба бўлиши эҳтимоли ҳақида баҳслар давом этаётганди.

Reuters нашрининг ёзишича, Дрезден университети бу каби тахминларга аниқлик киритиш учун май ва июнь ойида Дрезден шаҳри, Баутцен ва Гёрлиц туманларидаги 14-18 ёш оралиғидаги 1,5 минг ўқувчидан ҳамда 13 мактабнинг 500 ўқувчисидан қон таҳлилларини олди.

Университет шифохонаси вакили Рейнхард Бернернинг таъкидлашича, тест қилинган 2 минг одамнинг фақат 12 нафарида антитаналар борлиги аниқланган. Ва тадқиқотнинг дастлабки натижалари коронавирус тарқалишида мактаб болаларининг асосий рол ўйнаши ҳақидаги тахминни йўққа чиқарган.

Бернернинг айтишига қараганда, болалар коронавирус тарқалишида ҳатто тормоз вазифасини ҳам бажариши мумкин. Мактаблар ҳам вирус тарқатишда етакчи ролни ўйнамайди, ҳатто хонадонларда ҳам вирус тарқалиши илгари кутилганидан камроқ тезликда экани кузатилмоқда.

Саксония таълим вазири Кристиан Пиварз тадқиқот штатдаги мактабларнинг ёзги таътилдан кейин, августда қайта очилиши мумкинлигини кўрсатаётганини маълум қилган. Бунда, албатта, ўқувчиларнинг маълум шароитда дарсларга қатнаши назорат қилинади. Жумладан, болалар мактабларда тиббий ниқобда бўлиши, ижтимоий масофа сақлаши керак бўлади.

Бернернинг қайд этишича, вирус тарқалиш тезлиги нисбатан паст бўлган Саксонияда ўқувчилар иштирокида ўтказилган бу тадқиқот Германиянинг бошқа ҳудудлари учун ҳам намуна бўла олади. Масалан, давлатнинг вирус тарқалиш тезлиги юқори бўлмаган бошқа ҳудудларида ҳам Саксония тадқиқоти асосида мактабларни қайта очиш мумкин.

Германияда 13 июль ҳолатига кўра, 200 минг 47 та коронавирусдан зарарланиш ва 9135 та ўлим ҳолати қайд этилган, ҳозиргача 185100 киши тузалган.

Манба: Kun.uz «Замин»ни Telegram’да ўқинг!