Ўсмир қизлар томдан сакраб ҳалок бўлишди

7 июль, 2025 йил. Урганч шаҳрида эрталабги тинчликни юрак эзувчи фожеа бузди. Нурли ҳаёт кўчасида жойлашган кўп қаватли уйда содир бўлган воқеа жамиятни қаттиқ қўрқитди ва қайғуга солди. Икки ўсмир қиз – бири 15, иккинчиси 16 ёшда – етти қаватли уйнинг томига чиқиб, пастга сакраб тушишди. Улар ҳаётдан кетишди. Бу ҳақда собиқ депутат Расул Кушербаев ўз Телеграм саҳифасида маълум қилди. Кейинроқ Бош прокуратура бу ҳолатни ўз жонига қасд қилиш сифатида тасдиқлади.

Бу воқеа ҳақида Урганч шаҳар ИИБга соат 08:15 да хабар берилган. Қутқарувчилар ва тез ёрдам жамоалари воқеа жойига зудлик билан етиб боришган. Аммо афсуски, қизнинг ҳаётини сақлаб қолиш имкони бўлмаган. Улар ўша заҳотиёқ ҳалок бўлишган. Кейинги тергов ишлари давомида аниқланишича, ўз жонига қасд қилган қизлардан бири 2009, иккинчиси 2010 йилда туғилган бўлиб, уларнинг исмлари Д.С. ва S.B. эканлиги маълум қилинди.

Йигит бола ёки қиз бола – ўсмирлик инсон ҳаётида энг нозик даврлардан биридир. Бу ёшда ҳар бир қўпол сўз, ҳар бир бекорга айтилган гап инсон қалбини қирқиб ташлаши мумкин. Ва бу воқеа – фақат икки қизнинг ҳаёти эмас, балки бутун жамият учун қонли дарс, фоҷиали огоҳлик.

Прокуратура ҳозирда дастлабки тергов ҳаракатларини олиб бормоқда. Қизлар нега бундай қадамга борди? Улар қандай қийинчиликка дуч келишган? Қайси жараёнда уларга етарлича ёрдам берилмади? Саволлар жуда кўп. Аммо уларнинг ҳаётини қайтариб бўлмайди.

Ўсмирлик ёшидаги қизнинг қалбида қанақа ғам, қанақа умидсизлик бўлди эканки, у шундай оғир қарорни қабул қилди? Бу савол нафақат ҳуқуқни муҳофаза қилувчи органлар, балки барча ота-оналар, ўқитувчилар, психологлар ва жамият аъзолари олдида жавоб талаб қилади.

Ҳар куни фарзандимизнинг кўзларига қараяпмизми? Уларнинг қайғуси, ўйлари, истаклари билан қизиқаяпмизми? Ёки улар учун нафақат моддий, балки маънавий таянч ҳам бўлаяпмизми?

Баъзан, инсон ўз дардини очиқ айта олмаслиги мумкин. Айниқса, ўсмирликда. Улар кўпроқ ички оламида яшайди, ва биз – катталар, уларнинг юрагида нима кечаётганини фақат диққат билан, муҳаббат билан сеза оламиз.

Бундай ҳолатлар бизни ўз ўрнимизда ўйга толдириши шарт. Ҳар бир оила, ҳар бир мактаб, ҳар бир маҳалла болалар билан суҳбатлашиш, уларни эшитиш ва ёрдам беришни устувор вазифа қилиб олиши керак.

Бу каби фожеалар фақат хабар сифатида ўқилиб кетмаслиги лозим. Бу ҳолатлар ҳаётга, болалар руҳиятига ва жамиятдаги муносабатларга чуқур қараш зарурлигини кўрсатади.

Таълим муассасаларида психологик хизматлар тўлиқ ва самарали ишлаши керак. Ҳар бир бола ўзини эшитилаётган, кўрилаётган ва ардоқланаётганини ҳис қилиши зарур. Чунки эътибор – ҳаётни сақлаб қолиши мумкин бўлган кучли қуролдир.

Жамият биргаликда ҳаракат қилмаса, бундай оғриқли хатти-ҳаракатлар давом этаверади. Шунинг учун ҳам ҳар бир фуқаро, ҳар бир волидайн, ҳар бир мураббий бу воқеани юрагида ҳис қилиши лозим.

Қизлар ҳаётини сақлаб қолиб бўлмади. Аммо уларнинг фожеаси бошқа болалар ҳаётини сақлаб қолишимиз учун сабоқ бўлиши мумкин. Агар биз бундан хулоса чиқарсак, уларнинг ҳаёти бефойда кетмаган бўлади.

Бу икки гўзал қизнинг қисмати жамиятнинг юрагида оғриқ бўлиб қолади. Аммо бу оғриқ – кўзни очиш, қалбни уёқлаш ва эътиборни ошириш учун ишора бўлиши керак. «Замин»ни Telegram’да ўқинг!