28-октабр куни Сурхондарё вилояти ҳудудидан ўтувчи М-39 “Алмата–Бишкек–Тошкент–Термиз” автомобил йўлида DAF русумли юк машинасида ёнғин чиқди.
Фавқулодда вазиятлар вазирлигининг маълумотига кўра, воқеа ҳақида соат 08:54 да хабар келиб тушган. Қутқарув ва ёнғин ўчириш экипажи зудлик билан ҳодиса жойига етиб борган. Ёнғин соат 09:43 да ўраб олинган, 09:55 да эса тўлиқ бартараф этилган.
Дастлабки маълумотларга кўра, юк машинасининг двигател қисми, кабинаси ва юк бўлимидаги кўпикли маҳсулотлар тўлиқ ёниб кетган. Ҳодиса оқибатида ҳеч ким жабрланмаган.
Расмийлар билдиришича, ёнғин вақтида транспорт воситаларининг ҳаракати қисқа муддатга тўхтатилган, аммо ҳозирда йўл ҳаракати тўлиқ тикланган.
Ҳозирда ёнғиннинг келиб чиқиш сабаблари ҳамда етказилган моддий зарар миқдори аниқланмоқда. Мутахассислар тахминича, ҳодисага электр қисмларидаги носозлик ёки техник қизиб кетиш сабаб бўлган бўлиши мумкин.
FVV воқеа жойида олинган тезкор чора-тадбирлар туфайли ёнғин кенгроқ майдонга тарқалишининг олди олинганини маълум қилди.
