Фарғона вилоятида болаларга ноўрин саволлар берган тарбиячига нисбатан интизомий чора қўлланди, деб хабар берди вилоят Мактабгача ва мактаб таълими бошқармаси.
Ижтимоий тармоқларда тарқалган видеода тарбиячи болалардан “дадасидан қандай ҳид келиши” ҳақида сўраб, оғзаки сўровнома ўтказгани акс этган. Маълум бўлишича, мазкур ҳолат Фурқат туманидаги 1-сонли давлат боғчасида содир бўлган.
Текширув давомида аниқланишича, тарбиячи С.О. мазкур сўровномани ўқув дастурларида кўзда тутилмаган ҳолда, мустақил равишда ўтказган ва видеони ота-оналар учун тузилган Telegram гуруҳига жойлаштирган.
У билан суҳбат ўтказилиб, у қилган иши оқибатларини ўйлаб кўрмаганини тан олган. Шунингдек, унинг иш ҳужжатлари ва фаолияти тўлиқ текширилиб, айрим камчиликлар аниқланган.
Натижада тарбиячидан тушунтириш хати олинди ва унга нисбатан ҳайфсан интизомий жазоси қўлланди.
Бошқармага кўра, бу ҳолат педагогик этика талабларини бузиш деб баҳоланиб, бошқа тарбиячиларга ҳам бундай хатоларни такрорламаслик бўйича огоҳлантириш берилди.
“Zamin”ни Telegram'да ўқинг!
