Самарқанд вилоятининг Ургут туманида 5 нафар фарзанднинг онаси бўлган 43 ёшли аёл томорқасида тақиқланган ўсимлик — каннабис етиштиргани учун жиноий жавобгарликка тортилди. Суд ҳукми билан у озодликдан маҳрум этилди.
Маълумотларга кўра, 1982 йилда туғилган М.У. исмли аёл ўз яшаш ҳовлисида 2025 йил апрель ойи ўрталарида каннабис уруғларини эккан. У уларни “гул уруғи” деб ўйлаб, парвариш қилиб келган ва 229 туп ўсимлик етиштирган.
2025 йил 4 август куни ўтказилган тезкор тадбир чоғида унинг ҳовлисидан гиёҳвандлик хусусиятига эга бўлган ушбу ўсимликлар ашёвий далил сифатида ҳужжатлаштириб олинган. Эксперт-криминалистика маркази хулосасига кўра, етиштирилган ўсимликлар таркибида тетрогидроканнабинол — каннабис гиёҳванд моддаси мавжудлиги аниқланган.
Судда аёл ўз қилмишига тўлиқ иқрор бўлган ва бу ишни онгли равишда қилмаганини айтган. Унинг сўзларига кўра, у деҳқон бозоридан помидор кўчатлари ва гул уруғини сотиб олган, аммо кейин улардан гул чиқмаган. “Мен улар гул деб ўйлаганман, ҳеч қандай гиёҳванд ўсимлик экканимни билмаганман. Агар билганимда, парваришламаган бўлардим”, — деган у судда.
М.У.нинг айтишича, турмуш ўртоғи бошқа вилоятларда устачилик билан шуғулланади, ўзи эса уйда хўжалик ишлари билан банд бўлган. У, шунингдек, ўсимликни сотиш нияти бўлмаганини ва қилмишидан чин дилдан пушаймонлигини билдириб, суддан енгил жазо сўраган.
Жиноят ишлари бўйича Ургут туман суди аёлни Ўзбекистон Жиноят кодексининг 270-моддаси (тақиқланган экинларни етиштириш) 1-қисми ва 273-моддаси (гиёҳванд моддаларни тайёрлаш ва сақлаш) 2-қисми бўйича айбли деб топди.
Суд ҳукмига кўра, у 3 йил 8 ой муддатга озодликдан маҳрум этилди ва жазони умумий тартибли колонияда ўтайди.
Ҳозирда ҳукм қонуний кучга кирмаган ва тарафлар апелляция тартибида шикоят бериш ҳуқуқига эга.
Бу ҳолат яна бир бор аҳолини, айниқса деҳқончилик билан шуғулланувчи фуқароларни эҳтиёт бўлишга, ҳар қандай “гул уруғи”ни манбасини аниқлаб олишга чорлайди — чунки қонун тақиқлаган ўсимликни етиштириш жиноий жавобгарликни келтириб чиқаради.
