“Эл-Класико” ҳар галгидек нафақат голлар, балки эҳтиросларга ҳам бой кечди. Ўтган якшанба куни бўлиб ўтган “Барселона” — “Реал Мадрид” ўйинида ҳам вазиятлар қизиб кетди. “Сантьяго Бернабеу” клуби ғалабани қўлга киритди, аммо баҳс охирида икки юлдуз футболчи — Ламин Ямал ва Винисиус Жуниор ўртасида тортишув юз берди.
Ўйиннинг сўнгги дақиқаларида кескин муҳит авжига чиққан бир лаҳзада Ямал бразилиялик рақибига қараб: “Жанг қилмоқчимисиз?” — деб сўради. Бу гапга Винисиус ҳам қўл қовуштирмади: “Унда бошлаймиз!” — дея жавоб қайтарди.
Бу воқеа Иspaniyaning “Movistar+” телеканалининг “El Dia Despues” (Эртаси кун) дастуридаги махсус тасвирларда намойиш этилди. Камералар икки футболчи ўртасидаги эҳтиросли сўз алмашувни аниқ қайд этган.
Эслатиб ўтамиз, “Реал Мадрид” бу учрашувда 2:1 ҳисоби билан ғалаба қозонди. Мбаппе ва Беллингемнинг голлари мадридликларга уч очко тақдим этди ва клуб мусобақа жадвалида пешқадамлигини мустаҳкамлади.
Шундан кейин испан оммавий ахборот воситалари Винисиус ва Ямалнинг ўзаро муносабати ҳақида қизғин муҳокама бошлади. Айрим таҳлилчилар бу ҳолатни икки авлоднинг қарама-қаршилиги сифатида баҳолашса, бошқалар “Барса” ва “Реал” ўртасидаги доимий рақобатнинг табиий ифодаси сифатида қабул қилмоқда.
Ламин Ямал бор-йўғи 18 ёшда бўлишига қарамай, “Барселона” сафида асосий таркибда майдонга тушаётган ёш иқтидор. Винисиус эса охирги йилларда “Реал”нинг етакчи ҳужумчиларидан бири сифатида жаҳон футболида катта обрў қозонган.
“Movistar+” телеканали репортажида айтилишича, воқеадан кейин ҳар икки футболчи вазиятни чўзмасликка ҳаракат қилган ва ўйин якунлангач, майдонни тинч тарзда тарк этган. Бироқ мухлислар бу шиддатли лаҳзани ижтимоий тармоқларда кенг муҳокама қилишда давом этмоқда.
Шундай қилиб, бу йилги “Эл-Класико” нафақат натижаси билан, балки Винисиус ва Ямал ўртасидаги қизғин лаҳзалар билан ҳам ёдда қолади.
“Zamin”ни Telegram'да ўқинг!
