Қарздорлик — бу шунчаки рақам эмас, у молиявий интизомнинг кўзгусидир. Фарғона вилоятининг Данғара туманида жойлашган “Б.Б.” фермер хўжалиги буни ўз тажрибасида ҳис қилди.
Фермер хўжалиги раҳбари давлат солиқ инспекциясига жами 12 та ижро ҳужжати бўйича 194 миллион сўм қарздор бўлиб қолган. Давлат ижрочилари томонидан бир неча бор огоҳлантиришлар берилган бўлса-да, хўжалик раҳбари бу огоҳлантиришларга жиддий ёндашмаган.
Тушунтириш ишлари самара бермагач, МIB ходимлари мажбурий ижро чораларини қўллади. Фермер миниб юрган “Volkswagen” автомашинаси хатланди. Аммо бу ҳам раҳбарни ҳушёр қилмаган — у давлат ижрочиларига нисбатан тажовузкор оҳангда гапириб, вазиятни инкор этишда давом этган.
Шунга қарамай, қонун ўз сўзини айтди. Давлат ижрочилари автомобилни аукцион орқали сотувга тайёрлашни бошлади. Машинани сотишдан тушган маблағ фермер хўжалигининг давлат олдидаги қарзини қоплашга йўналтирилади.
