Москвадаги суд 33 ёшли ўзбекистонлик Маҳбубахон Оринбоевага 15 йил умумий тартибдаги колонияда жазо ўташга ҳукм чиқарди. Бу ҳақда ТАСС хабар берди.
Уни "Катиба Тавҳид вал-Жиҳод" жамоасини молиялаштирганликда айбдор деб топишган. Ушбу жамоа Сурияда фаолият юритувчи "Ҳейат Таҳрир аш-Шам" террорчи ташкилоти таркибига киради.
Тергов маълумотларига кўра, 2022 йил октябр ойида Оринбоева радикалларга ўзининг банк картаси маълумотларини тақдим этган. Кейинчалик ушбу картанинг ҳисобварағидан 6,5 минг рубл (1 миллион сўмдан кўпроқ) ўтказилган ва бу маблағ жиҳодчиларни қўллаб-қувватлашга йўналтирилган.
Оринбоева ўз айбини тан олмаган. Суд вакилининг маълум қилишича, чиқарилган ҳукм ҳали кучга кирмаган ва айбланувчи уни қайта кўриб чиқишни талаб қилиши мумкин.
Меҳмон гуруҳидаги фойдаланувчилар ушбу мақолага изоҳ қолдира олмайди.
