Тошкент шаҳрида байрам кайфияти янада авж олди. Пойтахтдаги энг баланд Янги йил арчаси Алишер Навоий номидаги Ўзбекистон Миллий кутубхонаси олдидаги катта майдонда қад ростлади. Байрам рамзи сифатида ўрнатилган ушбу арчанинг умумий баландлиги 35 метрни ташкил этади ва у шаҳар аҳли ҳамда меҳмонлар диққатини дарҳол ўзига тортмоқда.
Арчани безаш учун жами 33 мингта турли рангдаги ўйинчоқлар қўлланилган. Унинг энг юқори нуқтасида эса янги йил руҳини ифодаловчи рамзий юлдуз жойлаштирилган. Кечқурун ёритиш тизими ишга тушганда, арча бутун майдонни ёруғликка буркаб, ҳақиқий байрам манзарасини яратади.
Асосий байрам ҳудудининг умумий майдони 1,3 гектарни ташкил этиб, у ерда сайр қилиш, суратга тушиш ва байрамона дам олиш учун барча шароитлар яратилган. Шунингдек, катта арчанинг атрофида баландлиги 6 метрдан бўлган яна тўртта қўшимча арча ҳам ўрнатилиб, байрам муҳитини янада бойитиб турибди.
Янги йил арафасида бу майдон пойтахт аҳли учун энг машҳур ва серодам масканлардан бирига айланиши кутилмоқда. Қисқаси, Тошкент бу йил ҳам Янги йилни катта шукӯҳ, ёруғлик ва кўтаринки кайфият билан қарши олишга тайёр
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
