«Барселона» бош мураббийи Ҳанс-Дитер Флик клуб билан шартномани узайтириш эҳтимоли ҳақидаги гап-сўзларга муносабат билдирди. Сўнгги кунларда каталонияликлар немис мутахассиси билан янги келишув устида иш бошлагани ҳақида хабарлар пайдо бўлган эди. Айни пайтда Фликнинг амалдаги шартномаси 2026/27 йилги мавсум якунига қадар амал қилади.
Мутахассиснинг таъкидлашича, мураббийлик фаолиятида ҳатто бир ярим йил ҳам катта муддат ҳисобланади. Шу сабаб у бу масалага шошилмасдан, вазиятга хотиржам қарамоқда. Флик ўз сўзларида «Барселона»да ишлаётганидан чин дилдан мамнун эканини алоҳида таъкидлади.
Унинг айтишича, жамоада шаклланган муҳит, мураббийлар штаби билан ўзаро ишонч ва ҳамжиҳатлик унинг ишини анча енгиллаштирмоқда. Айниқса, спорт директори Деку билан ўзаро муносабатлар юқори даражада экани қайд этилди. Флик бу ҳамкорликни жуда самарали, деб баҳолади.
Шунингдек, немис мутахассиси клуб президентининг ишончи у учун катта аҳамият касб этишини яширмади. Айнан раҳбарият томонидан билдирилган ишонч унинг «Барселона»га келишида ҳал қилувчи омил бўлган. Фликнинг фикрича, яна бир ярим йил давомида жамоа билан ишлаш мутлақо табиий ҳолат, бироқ кейинги қарорлар президент позициясига ҳам боғлиқ бўлади.
«Биз учун энг муҳими — сифатли футбол намойиш этиш ва натижаларга эришиш. Қолган масалалар кейин муҳокама қилинади», — дея таъкидлади мураббий.
Қайд этиш жоиз, Ҳанс-Дитер Флик қисқа вақт ичида жамоада ижобий психологик муҳит яратишга эришди. «Барселона» унинг қўл остида барқарор ўйин кўрсатиб, мухлисларда келажакка нисбатан ишонч уйғотмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
