Боксчи ва блогер сифатида танилган Жейк Пол собиқ жаҳон чемпиони Энтони Жошуага қарши жангдан кейин ҳам ўз олдига қўйган режаларидан ортга чекинмаслигини маълум қилди. Мағлубиятга қарамай, америкалик спортчи келажакка ишонч билан қараётганини таъкидлади.
Полнинг айтишича, у албатта рингга қайтади ва бир кун келиб жаҳон чемпиони унвонини қўлга киритиш ниятидан воз кечгани йўқ. У Жошуага қарши тўқнашув қарийб олти раунд давом этганини эслаб, бу натижа уни ажаблантирмаганини билдирди.
Жейк Пол жанг пайтида асосий муаммо жисмоний ҳолат билан боғлиқ бўлганини очиқ тан олди. Унинг сўзларига кўра, вазн ошириш жараёни анча қийин кечган, бу эса жанг давомида тез чарчашига сабаб бўлган. Шунингдек, кардио тайёргарлиги етарли даражада бўлмагани ҳам ўз таъсирини кўрсатган.
“Агар чидамлилик устида кўпроқ ишлаганимда, жангни тўлиқ масофада олиб боришим мумкин эди. Аммо бугун қўлимдан келган барча имкониятни ишга солдим”, — деди Пол баҳсдан сўнг.
Эслатиб ўтамиз, 20 декабрь куни АҚШнинг Майами шаҳрида бўлиб ўтган жангда Энтони Жошуа олтинчи раундда Жейк Полни нокаутга учратиб, ишончли ғалабага эришган эди. Шунга қарамасдан, Полнинг баёнотлари унинг боксдаги йўли ҳали якунланмаганини кўрсатмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
