Сыйлық ішіндегі "есірткі": АҚШ-та Рождество маскасын киген ірі контрабанда әшкереленді

Кентукки штатының полициясы мерекелік қораптарға жасырылған 25 келіден астам метамфетаминді тәркіледі.

Тәртіп сақшылары есірткі сатумен айналысты деген күдікке ілінген 23 жастағы Джейкоб Таламантестің көлігін тоқтатты. Арнайы үйретілген ит көліктің салонында тыйым салынған зат бар екенін көрсеткенде, жүксалғышта Рождестволық сыйлық қағазына оралған күдікті қораптар табылды.

Тексеру барысында "сыйлықтардың" ішіне 55 фунт (шамамен 25 кг) салмақтағы метамфетамин салынғаны анықталды. Небраскалық жігіт бұл өлтіруші уды Айовадан әкелгенін және сатуды көздегенін мойындады. Қазір оған есірткінің заңсыз айналымы бойынша айып тағылған.