Иранның Жоғарғы басшысы Моджтаба Хаменеидің 28 ақпан күні Тегерандағы резиденциясына жасалған әуе соққысы салдарынан ауыр жарақат алғаны туралы мәліметтер тарап жатыр. Хабарларға қарағанда, бұл шабуылды Израиль жүзеге асырған және оқиға аймақтағы жағдайды одан сайын ушықтырып жіберген.
The New York Times басылымының Ирандағы жоғары лауазымды дереккөздеріне сілтеме жасап жазуынша, Хаменеидің бетін қатты күйік шалған және бұл жағдай оның еркін сөйлеу қабілетіне әсер етіп отыр. Осыған байланысты оған жақын күндері пластикалық ота қажет болуы мүмкін екені айтылуда.
Мәліметтерге сәйкес, ақпан айының соңынан бері оның бір аяғына бірнеше рет – кем дегенде үш мәрте хирургиялық ота жасалған. Дәрігерлер жағдайды тұрақтандыру бағытында жұмыс істеп жатқанымен, болашақта протез аяқ қажет болу ықтималдығы да жоққа шығарылмайды. Сондай-ақ, жақында оның қолына да ота жасалғаны атап өтілді.
Соған қарамастан, дереккөздердің хабарлауынша, Хаменеинің есі дұрыс және жағдайды бақылауда ұстап отыр. Дегенмен кейбір стратегиялық шешімдер қабылдау өкілеттігін ол әскери басшылар мен генералдарға жүктеген. Бұл мемлекет басқаруында уақытша ішкі билік бөлінісі туындағанын білдіруі мүмкін.
Айта кетерлігі, Жоғарғы басшы әзірге жұртшылық алдына аудио немесе видеоүндеулермен шығуды қаламай отыр. Бұған оның «әлсіз немесе қауқарсыз болып көрінгісі келмейтіні» себеп ретінде көрсетілуде. 8 наурызда қызметіне кіріскеннен бері ол негізінен жазбаша мәлімдемелермен шектеліп, олар бұқаралық ақпарат құралдары арқылы таратылуда.
Иран Сыртқы істер министрлігі болса Хаменеинің халық алдына шығуы үшін белгілі бір уақыт қажет екенін мәлімдеді. Бұл оның денсаулығы толық қалпына келуі үшін әлі уақыт керек екенін көрсетеді.
Қазіргі уақытта халықаралық майданда да түрлі мәлімдемелер естілуде. Соның ішінде Дональд Трамп Иран лидерінің тірі немесе өлі екендігіне қатысты күмәнді пікір білдірді. Мұндай пікірлер ақпараттық кеңістіктегі түрлі болжамдар мен талқылауларды одан сайын күшейте түсуде.
Еске сала кетейік, Моджтаба Хаменеи қызметіне кіріспес бұрын оның әкесі Әли Хаменеи Иранның Жоғарғы басшысы ретінде қызмет атқарған болатын. Оның да дәл осы 28 ақпанда болған шабуыл салдарынан қаза тапқаны хабарланған еді.
Әзірге ресми мәліметтер шектеулі болғанымен, Иран басшылығы төңірегіндегі жағдай халықаралық саяси ортада үлкен қызығушылық тудырып отыр. Алдағы күндері жаңа ақпараттар пайда болады деп күтілуде.
“Zamin”-ді Telegram-нан оқыңыз!
