Қазақстан Ресейден электр энергиясын импорттаудан бас тартпақ

Қазақстан 2027 жылдан бастап Ресейден электр энергиясын импорттауды толығымен тоқтатуды жоспарлап отыр. Бұл туралы елдің Энергетика вице-министрі Сұңғат Есімханов мәлімдеді.

Оның айтуынша, жоспарланған энергетикалық нысандар уақытында іске қосылса, ел ішкі қажеттілікті өз бетінше қамтамасыз ете алады.

Сонымен қатар, бұл жоспар атом электр станциясының құрылысы аяқталуын күтпестен жүзеге асырылатыны атап өтілді. Ресми мәліметтерге сәйкес, 2025 жылы Қазақстанда 123,1 миллиард кВт/сағ электр энергиясы өндірілген.

Тұтыну көлемі 124,6 миллиард кВт/сағ-ты құрады. Қазіргі таңдағы тапшылықтың белгілі бір бөлігі Ресейден импорт арқылы жабылуда.

Импортталған электр энергиясының бір бөлігі Қырғызстанға қайта экспортталатыны да хабарланды.