Мьянмада салмағы 11 мың карат болатын бірегей лағыл тас табылды

Фото: Мьянма Ақпарат министрлігі

Мьянмада салмағы 11 мың карат немесе 2,2 келі болатын сирек кездесетін лағыл тас табылды. Бұл туралы елдің Ақпарат министрлігі хабарлады.

Асыл тас Мандалай маңындағы Могок ауданынан табылды. Бұл аймақ Мьянманың негізгі асыл тас өндіру орталықтарының бірі болып саналады.

Мамандардың пікірінше, жаңадан табылған лағыл тас сапасы мен түсі жағынан бұрынғы көптеген тастардан асып түседі. Кейбір сарапшылар оның 1996 жылы табылған 21,45 мың караттық әйгілі лағыл тастан да қымбат болуы мүмкін екенін айтуда.

Тас қою қызыл түсті және сарғыш реңкті, шыны тәрізді жылтырлығымен ерекшеленеді. Сондай-ақ, оның әзірге өңделмеген күйінде сақталып жатқаны хабарланды.

Лағыл тастың нақты құны әзірге жарияланған жоқ. Оны кім тапқаны туралы да ресми ақпарат берілмеді.

Мьянма әлемдік нарықта нефрит пен басқа да асыл тастарды жеткізуші ірі елдердің бірі саналады. Сонымен қатар, елде асыл тастарға қатысты «қара базардың» да бар екені айтылады.

Анықтама үшін: 2015 жылы Женевада өткен Sotheby’s аукционында 25,59 караттық лағыл тас 30,33 миллион долларға сатылған болатын.