Иран өз ұшақтарының бір бөлігін көршілес елдерге көшірді

Иран АҚШ тарапынан болуы мүмкін әскери шабуыл қаупіне байланысты кейбір әскери және азаматтық ұшақтарын басқа елдерге көшірген болуы мүмкін. Бұл туралы CBS News өз дереккөздеріне сілтеме жасай отырып хабарлады.

Мәліметтерге сәйкес, Иранға тиесілі кейбір әскери ұшақтар Пәкістандағы Исламабад қаласының оңтүстігінде орналасқан Нур Хан әуе базасына жіберілген. Олардың арасында барлау тапсырмаларына бейімделген RC-130 әскери ұшағы да болғаны айтылуда.

Дереккөздердің хабарлауынша, ықтимал әскери қимылдар басталғанға дейін Иранның Mahan Air әуе компаниясына тиесілі бірнеше ұшақ Кабулға апарылған. Иран әуе кеңістігі жабылғаннан кейін бұл ұшақтардың Ауғанстанда қалып қойғаны белгілі болды.

Хабарламаларда Пәкістан мен Ауғанстан арасындағы жағдай ушыққаннан кейін ұшақтар Иран шекарасына жақын орналасқан Герат әуежайына көшірілген болуы мүмкін екені атап өтілген.

Алайда Талибан үкіметінің өкілі Забихулла Муджахид CBS News-ке берген түсініктемесінде бұл ақпаратты жоққа шығарды. Оның айтуынша, Ауғанстан аумағына Иран ұшақтары орналастырылды деген хабарлар шындыққа жанаспайды.