Қырғызстанда мемлекеттік қызметкерлерге костюмсіз жұмыс істеу ұсынылуда

Қырғызстанда мемлекеттік қызметкерлерге жаз маусымында жұмысқа костюм және галстуксыз келу ұсынылды. Бұл бастама энергия шығынын азайту мақсатында көтерілгені айтылуда.

Министрлер Кабинетінің төрағасы Адылбек Қасымалиев жеңіл киіммен жұмыс істеу кондиционерлерді азырақ пайдалануға көмектесетінін атап өтті. Осы арқылы электр энергиясын айтарлықтай үнемдеуге болатыны ескерілді.

Қасымалиев бұл ретте Жапония тәжірибесін мысалға келтірді. Оның айтуынша, осындай тәсіл арқылы Жапонияда миллиардтаған иена үнемделген.

Бастама әлеуметтік желілерде әртүрлі талқылануда. Кейбір қолданушылар мұны практикалық және пайдалы шешім деп бағаласа, басқалары мемлекеттік мекемелерде ресми киім үлгісі сақталуы керек екенін алға тартуда.