16:34 / 21.05.2026

«Қызымды сатсам, отбасымды төрт жыл асыраймын» — ауғанстандық әке

Ауғанстанның Гор провинциясында тұратын бір ер адам отбасын аман сақтап қалу үшін 7 жасар қызын сатуға мәжбүр екенін айтты. Бұл туралы BBC хабарлады.

Мәлім болғандай, Ауғанстанда қазір шамамен 4,7 миллион адам ашаршылық қаупінде өмір сүруде. Гор провинциясы — бұл дағдарыстан ең қатты зардап шеккен аймақтардың бірі.

Абдул Рашид Азимидің Роқия және Рохила есімді жеті жасар егіз қыздары бар. Оның айтуынша, отбасындағы ауыр экономикалық жағдайға байланысты қыздарының бірін сату туралы ойлауға мәжбүр болған.

«Қыздарымды сатуға дайынмын. Мен кедеймін, қарызға батқанмын, шарасыз қалдым. Жұмыстан үйге аш, шөлдеген және күйзеліс күйінде қайтып жатырмын. Балаларым 'Әке, бізге нан беріңізші', дейді. Бірақ мен оларға не бере аламын?», деді ол.

Абдулдың сөзінше, ол қыздарын тұрмысқа беру немесе үй шаруасына сатуға келіскен.

«Бір қызымды сатсам, қалған балаларымды кемінде төрт жыл қамтамасыз ете аламын. Бұл шешім жүрегімді ауыртады, бірақ басқа жол көріп тұрған жоқпын», дейді ол.

Қыздардың анасы Кайхан отбасының жағдайы өте ауыр екенін айтты.

«Біз тек нан мен қайнаған сумен күн көріп отырмыз. Тіпті шай да жоқ», дейді ол.

Мақалада Ауғанстанда ұл балалар болашақта отбасын асыраушы ретінде қаралатыны атап өтілген. Сол себепті экономикалық қиындыққа тап болған кейбір отбасылар қыз балаларын сатуға немесе ерте тұрмысқа беруге мәжбүр болуда. «Талибан» тарапынан әйелдердің білім алуы мен жұмыс істеуіне қойылған шектеулер бұл мәселені одан сайын күшейтті.

Сондай-ақ, елде неке кезінде қыздың отбасына қалыңмал беру дәстүрі де сақталған. Абдул мен Кайханның жасөспірім екі ұлы қалада аяқ киім тазалаумен айналысса, тағы бірі қоқыс жинап жүр.

Мақалада тағы бір ауғанстандық ер адам — Саид Ахмадтың тағдыры да келтірілген. Ол бес жасар қызы Шайқаны ауруына байланысты сатуға мәжбүр болғанын айтқан.

«Қызым аппендицит және бауыр ісігімен ауырып қалды. Оны емдетуге қаражатым жоқ еді. Сол себепті оны туысыма саттым», дейді ол.

Мәлім болғандай, Шайқаның отасы сәтті өткен. Қыз 200 мың ауғаниге (шамамен 3 200 доллар) сатылған және бұл қаражат емделу шығындарына жұмсалған.

Саидтің айтуынша, қыз әзірге отбасымен қалған, бірақ бес жылдан кейін ол туысының ұлына тұрмысқа шығу үшін олардың үйіне кетуі керек болады.

«Егер ақшам болғанда, ешқашан мұндай шешім қабылдамас едім. Бірақ ота болмаса, қызымнан айырылып қалуым мүмкін еді», дейді ол.

Қазіргі таңда Ауғанстанда кәмелетке толмаған қыздарды тұрмысқа беру жағдайлары кең таралған. «Талибан» үкіметі тарапынан қыздардың білім алуына қойылған тыйымдар бұл жағдайды одан сайын ауырлатуда.

БҰҰ мәліметтері бойынша, 2026 жылы Ауғанстанға келетін халықаралық гуманитарлық көмек көлемі өткен жылмен салыстырғанда 70 пайызға қысқарған. АҚШ және басқа да ірі донор мемлекеттер көмекті күрт азайтқаны елдегі гуманитарлық дағдарысты одан сайын тереңдетіп жатыр.