Трамп Польшаға қосымша 5 мың әскери жіберілетінін айтты

АҚШ президенті Дональд Трамп Польшаға қосымша 5 мың америкалық әскери қызметкер жіберілетінін мәлімдеді. Ол бұл туралы өзінің Truth Social парақшасында жазды.

Бұл мәлімдеме Пентагонның Польшаға 4 мың сарбаз жіберу жоспарынан бас тартқаны туралы хабарлардан бір апта өткен соң жасалды. АҚШ Қорғаныс министрі Пит Хегсет бұл шешімнің толықтай жойылмағанын, тек уақытша кейінге шегерілгенін айтқан болатын.

Трамп әкімшілігі соңғы апталарда «Америка бірінші кезекте» саясаты аясында Еуропадағы әскерилер санын қысқарту ниетін білдіріп келген еді. Соған қарамастан, Вашингтон Польшадағы әскери қатысуын сақтап қалғысы келетінін баса айтуда.

Бұған дейін АҚШ Германиядан 5 мың сарбазын шығаратынын жариялаған болатын. Әзірге Польшаға жіберілетін қосымша әскерилер дәл сол Германиядан шығарылып жатқан әскерлер есебінен бола ма, әлде бөлек контингент ретінде жіберіле ме, ол жағы белгісіз.