Вирусқа айналған ойыншық балаларды ауруханаға түсіріп жатыр

Соңғы уақытта бүкіл әлемде танымал болған NeeDoh сенсорлық ойыншықтардың балаларға елеулі қауіп төндіруі мүмкін екені анықталды. Дәрігерлер бұл ойыншықтарды қыздыру, мұздату немесе микротолқынды пешке салу ауыр күйік жарақаттарына әкелетінін айтты.

Мамандардың түсіндіруінше, NeeDoh ішіндегі жабысқақ масса жоғары температураның әсерінен қысым түзіп, ойыншықтың жарылуына себеп болуы мүмкін. Нәтижесінде қайнаған масса бет, қол және дененің басқа бөліктерін қатты күйдіреді. Өндіруші қаптамада ойыншықты қыздырмау және мұздатпау туралы ескерту жасағанымен, әлеуметтік желілердегі қауіпті челлендждерге байланысты балалар бұл ережелерді сақтамай жүр.

АҚШ-тың Миссури штатында жеті жасар қыз микротолқынды пеште қыздырылған ойыншықтың жарылуы салдарынан ауыр күйік алып, оған тері ауыстырып салу операциясы жасалған. Ұлыбританияда, Чикагода және Нью-Мексикода да осындай жағдайлар тіркелді.

Дәрігерлер мұндай жарақаттар тыртықтарға, көру қабілетінің төмендеуіне және басқа да ауыр асқынуларға әкелуі мүмкін екенін атап өтіп, ата-аналарды балаларын интернеттегі қауіпті челлендждерден сақтандыруға шақырды. Сондай-ақ NeeDoh және осыған ұқсас ойыншықтарды ешқашан қыздырмау, мұздатпау немесе ыстық жерде қалдырмау ұсынылды.