Қытайлық BYD компаниясы Еуропа нарығы үшін арнайы әзірленген алғашқы моделі — BYD Dolphin G DM-i хетчбэгін көрсетті. Бұл жаңа супермини өзінің ерекше плагин-гибридті (PHEV) жүйесімен электромобильдермен де, дәстүрлі бензинді көліктермен де бәсекелесуді көздейді. Автокөлік биыл күзде Ұлыбритания мен Еуропа нарықтарында сатылымға шығады деп күтілуде. Бұл туралы Autocar.co.uk хабарлайды.
Жаңа модельдің ұзындығы 4160 мм, ол техникалық жағынан жақын туысы Dolphin Surf EV-мен қатар тұрады. BYD Dolphin G нарықта Renault Clio, Volkswagen Polo және Toyota Yaris сияқты танымал модельдерге бәсекелес болады. Басқалардан айырмашылығы, бұл модель толыққанды плагин-гибридті қуат қондырғысына ие, ол электр қуатымен де ұзақ қашықтықты жүріп өте алады.
Әзірге BYD Super Hybrid жүйесінің барлық егжей-тегжейін ашпаса да, ол Atto 2 DM-i кроссоверіндегі жүйеге ұқсас болады деп болжануда. Жүйе құрамына 1.5 литрлік бензинді қозғалтқыш кіреді, ол негізінен алдыңғы дөңгелектерді қозғалтатын электромотор үшін генератор қызметін атқарады. Компания автокөліктің жалпы жүріс қоры 621 мильден (шамамен 1000 км) асатынын мәлімдеді.
BYD Dolphin G компанияның Венгриядағы жаңа зауытында шығарылады деп жоспарланған. Компанияның вице-президенті Стелла Ли Еуропалық B-сегментін ең маңызды нарықтардың бірі деп атады және бұл модель ықшам автокөліктер туралы түсінікті өзгертетінін атап өтті. BYD стратегиясына сәйкес, болашақта еуропалық тұтынушылар брендті жергілікті өндіруші ретінде қабылдауы көзделіп отыр.
“Zamin”-ді Telegram-нан оқыңыз!
