Андижан қаласындағы 36-мектепте қайғылы оқиға орын алды. Мектеп қызметкерлері техникалық спиртпен уланды.
Бастапқы мәліметтерге сәйкес, екі адам қайтыс болды, үш адам ауыр хәлде ауруханада жатыр. Оқиға 22-қазан күні шамамен сағат 17:00-де болған.
Жұмыс күні аяқталған соң, мектептің шаруашылық істері бөлімінің бастығы, алғашқы әскери дайындық пәнінің мұғалімі, қарауыл және тағы бір мұғалім бірге жиналған. Олар кешкі ас кезінде мектеп зертханасында сақталған сұйықтықты ішкен және бұл техникалық спирт екені анықталған.
Мәліметтерге сәйкес, шаруашылық істері бөлімінің бастығы оқиға орнында қайтыс болған, қарауыл болса ауруханаға жеткізіліп жатқанда көз жұмған. Қалғандары қатты улану белгілерімен ауруханаға жатқызылған, кейбіреулерінің хәлдері ауыр деп бағалануда.
Белгілі болғандай, мектеп директоры оқиға кезінде ғимаратта болмаған және бұл жиналысқа қатыспаған. Оқиғаның егжей-тегжейі мен зардап шеккендердің жағдайы туралы қосымша ақпарат әзірше берілген жоқ.
Бас прокуратураның баспасөз қызметінің жетекшісі Хаёт Шамсиддиновтың айтуынша, бұл оқиға бойынша ішкі істер органдары алдын ала тергеу амалдарын жүргізуде. Оқиғаның себептері мен жағдайлары анықталуда.
