Наманган облысындағы балабақшалардың бірінде көңіл құлазытатын оқиға болды. Әлеуметтік желілерде үш жасар қыздың көзіне қарындаш қадалып кеткені түсірілген видео тарап кетті. «Миллий» телеарнасының хабарлауынша, оқиға Чортоқ ауданындағы №20 балабақшада болған.
Мәліметке сәйкес, бала жүгіріп бара жатқан кезде тепе-теңдігін жоғалтып құлап, қолындағы қарындаш көзіне кіріп кеткен. Оқиғадан кейін тәрбиешілер қызды бірден ауруханаға жеткізген.
Дәрігер Бобур Хожаев телеарнаға берген сұхбатында науқастың ауруханаға ауыр хәлде түскенін мәлімдеді.
«Науқастың оң көзіне қарындаш кірген. Шұғыл медициналық көмек көрсетілді, қазір реанимация және қарқынды ем шаралары жүргізіліп жатыр. Жалпы жағдайы тұрақты ауыр деңгейде, қыз бала есін біледі», — деді дәрігер.
Қазіргі уақытта қыздың көру қабілеті сақталғаны айтылуда. Медицина қызметкерлері оның жақын арада толықырақ сауығып кететініне үміт білдіруде.
“Zamin”-ді Telegram-нан оқыңыз!
