Щесны 8 ойында 15 гол өткізді

Барселонаның негізгі қақпашысы Жоан Гарсия жарақат алғаннан кейін, команда тұрақты түрде гол жіберетін болды. 24 жастағы испаниялық қақпашы 7 ойында небәрі 5 гол жіберіп, үш кездесуде қақпасын «құрғақ» сақтап қалған еді.

Алайда Войцех Щенсны алаңға шыққан соң, қарсыластар Барселона қақпасына 8 ойында 15 гол соғуға қол жеткізді. Польша қақпашысы бірде-бір «құрғақ» ойын өткізе алмады.

Сәрсенбі күні Ханс-Дитер Флик баптаған Барселона УЕФА Чемпиондар лигасы аясында қонақта Бельгияның Брюгге командасына қарсы ойында 3:3 есебімен тең түсті. Каталониялықтар барлық турнирлерде қатарынан 9 кездесуде гол өткізіп, соңғы 12 жылдағы клубтың антирекордын тіркеді.

9 қараша күні Барселона Ла Лига аясында Сельта командасымен кездеседі.