Томори Роналдуды қалай тоқтатқанын еске алды

«Милан» клубының орталық қорғаушысы Фикайо Томори Криштиану Роналдумен болған дуэлі туралы айтып өтті. Англиялық қорғаушы мен португалиялық шабуылшы 2020/21 маусымының соңында, Роналду «Ювентус» сапында ойнап жүрген кезде кездескен.

Сол ойында Томори жұлдызды футболшыны тоқтата алған және «россонери» 3:0 есебімен жеңіске жеткен. «Кездесу алдында өзіме: «Бүгін Роналдуға гол салуға жол бермеймін», деп айттым.

Қалай да бір жолын тауып, қысымнан құтылуға тырыстым. Роналду карьерасы бойында соншалық көп гол соққан-ды, егер оны тоқтата алмасам да, ешкім таңқалмас еді.

Маңыздысы – оған допқа бірінші болып тию мүмкіндігін бермеу – әйтпесе бәрі аяқталатын», – деді Томори, оның сөзін Италия баспасөзі келтіреді. Белгілі болғандай, Криштиану Роналду 2021 жылы «Ювентусты» тастап, «Манчестер Юнайтедке» өткен еді.

2023 жылдың басынан бері португалиялық шабуылшы Сауд Арабиясының «Әл-Наср» клубында ойнап келеді.