Челси Кейс Смитті сатып алуды жоспарлауда

19 жастағы "AZ Alkmaar" жартылай қорғаушысы Кейс Смит Англияға ауысуы мүмкін. Goal.com порталының хабарлауынша, Лондонның "Челси" клубы жас әрі болашағынан үміт күттіретін футболшыны өз құрамына қосуды жоспарлап отыр.

Дереккөздің мәліметіне сәйкес, "Челси" басшылығы бұл трансферді келесі жылдың жазында жүзеге асыруға талпынуда. Кейс Смиттің трансферлік құны 22 миллион еуроны құрайды.

Футболшы қазіргі келісімшарт бойынша Нидерланд клубымен 2028 жылдың ортасына дейін байланысқан. 2025/2026 жылдар маусымында жартылай қорғаушы 25 ойынға шығып, 2 гол соғып, 5 нәтижелі пас берген.