Ташкент қаласында автобус аялдамалары маңындағы сауда нүктелеріне шектеу қойылады — әкімдік мәліметіне сәйкес, аялдамалардағы дүкендер кезең-кезеңімен алынып тасталады.
Қала әкімшілігі бұл шешімді халықаралық тәжірибемен түсіндіреді: заманауи аялдама тұжырымдамасына сәйкес аялдама аумағында сауда нысандары болмауы керек. Себебі қарапайым — жолаушылар көлікті еркін әрі қауіпсіз күтуі тиіс, платформалар жеткілікті кең болуы керек, кептеліс күшейген кезде оларды кеңейту мүмкіндігі сақталуы тиіс, сондай-ақ инклюзивті орта қамтамасыз етілуі қажет.
Айтылғандай, елордада қоғамдық көлік инфрақұрылымы бойынша кең ауқымды тексеру жүргізілген. Бірінші кезеңде 100 км аумақ қамтылып, 360-тан астам аялдама мен 190 ірі және шағын қиылыс тексерілген.
Аудит нәтижесінде аялдамалар аумағында 110 сауда нысаны орналасқаны анықталған. Олардың 61-і аялдама кешенінің аумағына иелік ету немесе оны пайдалану құқығын растайтын құжаттарды ұсына алмаған. Енді олардың қызметіне құқықтық баға беріліп, тиісті шаралар қабылданады.
Қала әкімшілігінің тиісті шешіміне сәйкес барлық аялдамаларды жаңарту жоспарланған. Рұқсат құжаттары бар кәсіпкерлер үшін сауда нүктелерін көшіру мақсатында басқа орын бөлу және өтемақы төлеу механизмі де қарастырылған.
Қысқасы, аялдамалар «шағын базарлар» емес, қоғамдық көлік үшін қолайлы әрі қауіпсіз кеңістікке айналуы күтілуде.
