Диагностикада инқилоб: Microsoft AI шифокорлардан 4 баробар аниқ ташхис қўйди

Microsoft компанияси тиббий ташхис қўйиш жараёнида янги инқилобга асос солиши мумкин бўлган MAI Diagnostic Orchestrator номли сунъий интеллект тизимини намойиш этди. Wired’нинг ёзишича, ушбу янгилик шифокорлар гуруҳининг кўрсаткичларидан тўрт баравар аниқроқ ташхис қўя олган.

Таъкидланишича, бу инновацион тизим нафақат беморларнинг ҳолатини тез ва самарали баҳолай олади, балки тиббий текширув харажатларини ҳам 20 фоизга қисқартириб беради. Microsoft’нинг сунъий интеллект бўйича бўлим раҳбари Мустафо Сулаймон ушбу лойиҳани "тиббий зеҳн сари ташланган ҳақиқий қадам" деб баҳолади. MAI Diagnostic Orchestrator кўплаб етакчи тил моделлари — ChatGPT, Gemini, Claude, LLaMA ва Grok’ни бирлаштиради ва экспертлар ҳамкорлигига асосланган фаолият юритади.

Тизим New England Journal of Medicine’да эълон қилинган 304 та клиник ҳолат асосида синовдан ўтказилди. У шифокорлар каби беморнинг аломатларини таҳлил қилиб, тестлар тайинлаб, ташхис қўйди. Натижаларга кўра, MAI Diagnostic Orchestrator’нинг аниқлик даражаси 80 фоизни ташкил этган, шифокорларники эса атиги 20 фоизга етган. Шу билан бирга, сунъий интеллект арзон, лекин самарали усулларни танлай олгани ҳам қайд этилган.

Лойиҳага Google’нинг собиқ етакчи мутахассислари раҳбарлик қилмоқда. Microsoft уларни ўз сафига жалб қилиб, рақобатчи техногигантларга кучли зарба бермоқда. Компания вице-президенти Доминик Кингнинг фикрича, эндиги қадам — бу технологияни реал тиббий шароитларда синовдан ўтказиш бўлади.

Бироқ, мутахассислар натижаларга эҳтиёткорлик билан ёндашиш кераклигини таъкидлашмоқда. Чунки синов жараёнида шифокорлар ўзларининг барча қўшимча ёрдам воситаларидан фойдаланмагани инобатга олинмаган. Шунингдек, сунъий интеллект беморларнинг индивидуал хусусиятларини ва мавжуд шароитларни қандай ҳисобга олади, деган масала ҳам аниқ эмаслигича қолмоқда.

Айни пайтда, Microsoft бу тизимни оммавий тижоратга чиқарадими ёки йўқ — бу ҳали номаълум. Аммо MAI Diagnostic Orchestrator’ни Bing ёки бошқа тиббий платформаларга интеграция қилиш имконияти кўриб чиқилаяпти. Microsoft’нинг фикрича, бундай илғор технологиялар келгусида тиббиётда сарфланадиган маблағларни сезиларли камайтиришга ёрдам беради.

Тез фурсатда сунъий зеҳн соғлиқни сақлаш соҳасини тубдан ўзгартириши мумкин. Лекин ҳар қандай илғор технология сингари, унинг ҳақиқий таъсири фақат вақт ўтиши билан аниқ бўлади. Шубҳасиз, Microsoft ташаббуси дунё тиббиётида янги даврни бошлаб бериши мумкин. «Замин»ни Telegram’да ўқинг!