Avstraliyada 750ga yaqin koalalar vertolyotdan turib otib o‘ldirildi

Avstraliyaning Viktoriya shtatida sodir bo‘lgan so‘nggi voqea jamoatchilik orasida jiddiy muhokamalarga sabab bo‘lmoqda. Sky News nashri tarqatgan ma’lumotga ko‘ra, Budj Bim milliy bog‘ida 750 ga yaqin koala otib o‘ldirilgan. Bu operatsiya o‘tgan oyda yuz bergan ko‘lamli o‘rmon yong‘inlaridan so‘nggi “rejalashtirilgan tadbirlar” doirasida amalga oshirilgan.

Yong‘indan keyingi fojea — 2 ming gektar butazor kuyib ketdi
Ma’lum qilinishicha, yong‘in oqibatida 2 mingga yaqin butazor yakson bo‘lgan, va bu hududdagi ko‘plab koalalar og‘ir jarohat, suv yetishmovchiligi va ochlikdan azob chekkan. Rasmiylar ana shu og‘ir vaziyatni asos qilib, ularni otib yo‘q qilishga qaror qilgan.

Bu kabi qat’iy qaror, aytishlaricha, koalalarni og‘riqdan xalos qilish maqsadida qabul qilingan.

Vertolyotdan turib o‘qqa tutish — Viktoriyada ilk marta
Operatsiya vertolyot orqali olib borilgan bo‘lib, bu kabi usul avval Viktoriyada qo‘llanilmagan. Shtatning bosh vaziri Jasinta Allanning ta’kidlashicha, nishonga olingan koalalarning bari og‘ir ahvolda bo‘lgan, va qaror mutaxassislarning baholashi asosida qabul qilingan.

Himoyachilar norozi: “Qanday qilib yuqoridan koalani to‘g‘ri baholash mumkin?”
Hayvon himoyasi bilan shug‘ullanuvchi bir necha tashkilotlar bu qarorni shiddat bilan tanqid qilmoqda. “Koala Alliance” rahbari Jess Robertson vertolyotdan turib koalaning holatini aniqlash imkoni shubhali ekanini ta’kidlagan.

Jorjia Persell — “Hayvonlar uchun adolat” partiyasi vakili esa bu kabi amaliyotda onalik xaltasida bolasini ko‘tarib yurgan koalalar ham o‘ldirilishi mumkinligini aytgan.

“Vertolyotdan qarab, koala onami, uning xaltasida bolasi bormi-yo‘qmi — ajratib bo‘lmaydi. Bu esa yanada ko‘proq beayb hayvonlarning yo‘q qilinish xavfini oshiradi”, — dedi u.

Muhokama ochiq: bu hal etishmi yoki halokatmi?
Qo‘llangan chora “insoniy” yechim sifatida ko‘rilayotgan bo‘lsa-da, jamoatchilik va himoyachilar fikricha, bunday usuldagi yo‘q qilish ortida axloqiy, biologik va gumanitar savollar turibdi. Qiynayotgan savol esa shunday: haqiqatan ham boshqa chora qolmaganmidi?

Siz nima deb o‘ylaysiz — tabiatdagi hayotni “insonparvarlik” yo‘li bilan yo‘q qilish to‘g‘rimi? Qanday yondashuvlar bu kabi vaziyatda to‘g‘riroq bo‘lishi mumkin? Fikringizni izohda qoldiring. “Zamin”ni Telegramʻda oʻqing!