Shavkat Mirziyoyev Rossiya tashqi ishlar vaziri Sergey Lavrovni qabul qildi

23 aprel kuni O‘zbekiston Respublikasi prezidenti Shavkat Mirziyoyev mamlakatimizga amaliy tashrif bilan kelgan Rossiya tashqi ishlar vaziri Sergey Lavrov va uning hamrohlarini Samarqand shahrida qabul qildi.

Muloqot boshida Rossiyaning yuqori martabali vakili davlat rahbari Shavkat Mirziyoyevga Rossiya Federatsiyasi prezidenti Vladimir Putinning samimiy salomlari va eng ezgu istaklarini yetkazdi.

Uchrashuvda ikki davlat o‘rtasidagi ko‘p asrlik do‘stlik, har tomonlama strategik sheriklik va ittifoqchilik munosabatlarini yanada mustahkamlash hamda davlat rahbarlari darajasidagi uchrashuvlar davomida erishilgan kelishuvlarning amalga oshirilishiga oid eng muhim masalalar atroflicha muhokama qilindi.

O‘zaro munosabatlarda barcha sohalarda yuqori darajadagi aloqalar va samarali hamkorlik faol davom etayotgani ta’kidlandi. Mamlakatlar o‘rtasidagi tovar aylanmasi va investitsiyalar hajmi barqaror o‘sib bormoqda. Ikki davlat hududlari hamda yirik sanoat korxonalari o‘rtasidagi o‘zaro hamkorlik aloqalari yangi bosqichga ko‘tarilmoqda.

Shuningdek, madaniyat va san’at sohalaridagi aloqalar, fan va ta’limdagi hamkorlik, sog‘liqni saqlash va sport yo‘nalishidagi qo‘shma loyihalar, turizm yo‘nalishidagi sheriklik munosabatlari yanada faollashib borayotgani yuqori baholandi.

Bundan tashqari, mintaqaviy va xalqaro ahamiyat kasb etuvchi ayrim dolzarb masalalar yuzasidan ham fikr almashildi.

Muloqot samimiy, ochiq va konstruktiv ruhda bo‘lib o‘tdi. Tomonlar O‘zbekiston va Rossiya o‘rtasidagi ittifoqchilik munosabatlarini yanada rivojlantirish va mustahkamlash yo‘lidagi kelishuvlarni davom ettirishga kelishib olishdi. “Zamin”ni Telegramʻda oʻqing!