Abbosbek Fayzullayevning o‘yinidagi tushkunlik sababi nima? Mutaxassis fikrini bildirdi

Moskvaning «SSKA» klubi sobiq futbolchisi Aleksandr Grishin jamoaning o‘zbekistonlik qanot hujumchisi Abbosbek Fayzullayevning joriy mavsumdagi o‘yinlariga o‘z munosabatini bildirdi. Uning ta’kidlashicha, «armiyachilar»ning taktik sxemasidagi o‘zgarishlar futbolchining ko‘rsatayotgan natijalariga salbiy ta’sir o‘tkazmoqda.

«Fayzullayev tabiatan qanot hujumchisi. U aynan qanotda, erkin va tezkor harakatlari bilan o‘yinni yorqinroq ko‘rsata oladi. Hozir esa murabbiylar uni o‘zining an’anaviy bo‘lmagan pozitsiyalarda ishlatishmoqda. Bu Abbosbekda noqulaylik va ishonchsizlikni keltirib chiqaryapti. Shuning uchun ba’zi paytlarda u maydonda o‘zini yo‘qotib qo‘yadi. Agar uning eski o‘rniga qayta qo‘yishsa, yana avvalgiday yorqin o‘yinlarini ko‘rsata boshlaydi», – deydi Grishin.

Ma’lumot uchun, 21 yoshli iqtidorli futbolchi ushbu mavsumda «SSKA» tarkibida Rossiya Premer Ligasi hamda mamlakat kubogi doirasida o‘tkazilgan 32 ta uchrashuvda maydonga tushgan va bu o‘yinlarda 3 ta gol kiritib, 7 marta samarali pas bergan. Klub bilan uning shartnomasi 2026 yil yozigacha mo‘ljallangan bo‘lib, Transfermarkt portali uning hozirgi bozor narxini 8 million yevro atrofida baholamoqda.

Avvalroq, Abbosbek Fayzullayevning o‘yin uslubiga Turkiyaning nufuzli klublaridan biri – «Galatasaroy» jiddiy qiziqish bildirgani haqida xabarlar tarqalgan edi. Bundan tashqari, shu yilning qishki transfer oynasi vaqtida portugaliyalik mashhur klub «Benfika» bilan kelishuv amalga oshmay qolgani ham ma’lum qilingandi.

Hozircha uning «SSKA»dagi istiqboliga nisbatan savollar ochiq qolmoqda. Biroq murabbiylar tomonidan o‘zining an’anaviy qanot pozitsiyasiga qaytarilsa, yosh va iqtidorli futbolchi yana muxlislarni o‘zining tezkor va yorqin o‘yinlari bilan xursand qilishi mumkin. “Zamin”ni Telegramʻda oʻqing!