Britaniya va Germaniya Kiyev uchun “50 kunlik kampaniya”ni boshlashni taklif qilmoqda

Yevropada xavfsizlik muammolari yana kun tartibiga chiqdi: Buyuk Britaniya mudofaa vaziri Jon Xilining so‘nggi bayonotlari Ukraina uchun xalqaro harbiy yordamda yangi bosqichni boshlab berishi mumkin, deb yozadi thetelegraph.co.uk.

Jon Xili va uning nemis hamkasbi Boris Pistorius rahbarligida o‘tadigan Ukraina mudofaasi bo‘yicha kontakt guruhining “Ramshtayn” formatidagi navbatdagi yig‘ilishida ishtirokchi davlatlardan “50 kunlik kampaniya”ni amalga oshirish taklif qilinmoqda. Bu tashabbusning asosiy maqsadi — Kiyevga harbiy yordamni yanada tezlashtirish va frontdagi imkoniyatlarni kengaytirishdir.

Hilining fikricha, aynan shu qisqa vaqt ichida Ukraina armiyasi uchun zamonaviy qurol-yarog‘, raketa va havo mudofaa tizimlarini yetkazib berish ustuvor vazifaga aylanadi. Mudofaa vazirligi ma’lumotlariga ko‘ra, Britaniya tomoni 2025 yilda Ukrainaga 700 million funt sterlinglik (800 million yevro) raketa, artilleriya snaryadlari va uchuvchisiz uchoqlarni yetkazib berishni zimmasiga olgan. London va Berlin esa yangi yig‘ilishda Ukraina uchun muhim harbiy xaridlarni tasdiqlashi kutilyapti.

AQSHda esa oxirgi haftalarda Donald Trampning bayonotlari xalqaro hamjamiyat diqqat markazida. Tramp, agar 50 kun ichida Ukraina–Rossiya o‘rtasida tinchlik kelishuvi amalga oshmasa, Rossiya bilan aloqador barcha savdo sheriklariga 100 foizlik bojlar joriy qilishini bildirdi. Shuningdek, AQSH Ukrainaga zamonaviy Patriot tizimlari va katta miqdorda qurol-yarog‘ yordam berishini va’da qilmoqda.

Tahlilchilar fikricha, bunday qat’iy bayonotlar va yangi harbiy kampaniyalar Rossiyaga muzokaralar stoliga o‘tirish uchun jiddiy bosim sifatida qaralayotgani aniq. Jon Xilining “Ukrainani qurollantirish, Putinni muzokaraga majburlash kerak” degan so‘zlari zamirida ham aynan shu strategiya yotadi.

Ayni paytda, Vashington va Moskva o‘rtasida to‘g‘ridan to‘g‘ri muloqotlar davom etmoqda. Donald Tramp hamon tinchlik uchun imkoniyatlar izlayotganini ta’kidlasa-da, frontda vaziyat keskin bo‘lib turibdi: raketalar Kiyevga uchmoqda, tinch aholi va harbiylar zarar ko‘rmoqda.

Shu bilan, Ukrainadagi urushning taqdiri navbatdagi 50 kunlik harbiy yordam kampaniyasi va xalqaro siyosiy bosimlarga bog‘liq bo‘lib qolmoqda. Yevropa va AQSHning birlashgan strategiyasi frontdagi holatni o‘zgartirishi, Rossiyani muzokaralarga majbur qilishi mumkin. Bu jarayonda esa Kiyev xalqaro hamkorlaridan nafaqat zamonaviy qurol-yarog‘, balki aniq va uzoq muddatli siyosiy qo‘llov kutayotgani aniq. “Zamin”ni Telegramʻda oʻqing!