2 fevral kuni qimmatbaho metallar bozorida kutilmagan “silkinish” kuzatildi: oltin bir troya unsiyasi uchun tarixiy maksimumga yaqinlashgan 5600 dollar atrofidan 4400–4800 dollar diapazoniga tushib ketdi. Bu taxminan 15–20 foizlik pasayish degani. Qisqasi, kecha “himoya devori” bo‘lib turgan oltin bugun biroz “sustlashib qoldi”.
Kumushda vaziyat yanada shiddatli bo‘ldi. Unsiya uchun 120 dollardan 75–80 dollargacha tushish — qisqa vaqt ichida qariyb 30 foiz yo‘qotishni anglatadi. Ya’ni, bozordagi kayfiyat bir necha savdo sessiyasi ichida keskin almashdi.
Tahlilchilar aytishicha, bunday katta amplituda hatto o‘zgaruvchanligi bilan mashhur qimmatbaho metallar bozori uchun ham kam uchraydigan holat. Bu yerda “oddiy tebranish” emas, jiddiy reaksiya ketyapti.
Qulashga olib kelgan asosiy omillar
1) Rekorddan keyin foydani ommaviy qayd etish
2025 yil davomida geosiyosiy beqarorlik va “xavfsiz aktivlar”ga talab yuqori bo‘lgani uchun oltin va kumush ancha qimmatladi. Narx rekord darajalarga chiqqanidan keyin yirik investorlar va jamg‘armalarda tabiiy refleks ishlaydi: “foyda turgan joyida yozib olaylik”. Ana shu ommaviy foyda qayd etish to‘lqini bozorni pastga tortib ketgan bo‘lishi mumkin.
2) AQSH FZT atrofidagi kutilmalar o‘zgardi
Bozorga yana bir bosim — AQSH Federal zaxira tizimi atrofidagi yangiliklar va kutilmalardan keldi. Investorlar Kevin Uorsh FZT rahbari bo‘lishi ehtimoli haqidagi xabarlarga ham reaksiya qildi. Uorsh odatda qat’iyroq pul-kredit siyosati tarafdori, degan qarash bor.
Bu nimani anglatadi? Agar foiz stavkalari tez va katta miqyosda tushirilishi ehtimoli kamaysa, foiz keltirmaydigan aktivlar — ya’ni oltin va kumush — investor ko‘zida birdaniga kamroq jozibador bo‘lib qoladi. Shu sabab bozor “pozitsiyalarni qisqartirish” rejimiga o‘tib ketadi.
3) Dollarning mustahkamlanishi
Foizlar va daromadlar bo‘yicha kutilmalar fonida dollar mustahkamlandi. Dollar kuchayganda qimmatbaho metallar odatda bosim ostida qoladi: ular boshqa valyutadagi investorlar uchun qimmatroq tuyuladi va talab qisqarishi mumkin. Natijada narxlarga yana bir “og‘irlik” tushadi.
Bozor reaksiyasi va keyingi ssenariylar
Mutaxassislar bu pasayishni ko‘p holatda “keskin o‘sishdan keyingi tuzatish” sifatida ko‘rishi mumkinligini ta’kidlayapti. Ya’ni bozor rekordlarni “sovutyapti”, havoni chiqaryapti.
Keyingi dinamika esa uchta kalit nuqtaga bog‘liq:
- FZTning real qadamlari va signallari;
- FZT rahbariyati siyosati qaysi tomonga og‘ishini aniqlashishi;
- AQSH dollarining keyingi harakati.
Agar qat’iy siyosat kutilmalari saqlansa, metallar bozorida bosim davom etishi ehtimoli bor. Agar kutilmalar yumshasa — oltin-kumush qayta “o‘ziga kelishi” ham mumkin. Hozircha eng to‘g‘ri xulosa shu: bozor emotsiyaga tez kiryapti, demak, yaqin kunlarda ham katta tebranishlar bo‘lishi ehtimoldan xoli emas.
“Zamin”ni Telegramʻda oʻqing!
