O‘zbekistonda mol va qo‘y go‘shti narxlari yana o‘sishda davom etmoqda. O‘tgan yilda go‘sht keskin qimmatlab, aholining kundalik sarf-xarajatlariga jiddiy ta’sir ko‘rsatgan edi. Yangi yil boshida ham bozorda arzonlashuv alomatlari ko‘rinmadi.
Mutaxassislar ta’kidlashicha, 2025 yilda go‘sht narxining ko‘tarilish sur’ati umumiy inflyatsiya ko‘rsatkichidan bir necha barobar yuqori bo‘lgan. Shu bilan birga, mahalliy go‘sht yetishtirish hajmlari sekinlashgan, import esa keskin ko‘paygan. Ana shu omillar bozorda narxlarga qo‘shimcha bosim bermoqda.
2026 yil yanvar oyida ham qimmatlashish yo‘nalishi saqlanib qoldi. Xususan, Toshkentdagi yirik bozorlarda oxirgi bir oy ichida mol go‘shti va qo‘y go‘shti narxlari yana ko‘tarildi. Ayniqsa, qo‘y go‘shti segmentida sezilarli o‘sish qayd etilmoqda.
Ekspertlar fikriga ko‘ra, agar ishlab chiqarish hajmlari oshirilmasa va ichki bozorda taklif bilan talab o‘rtasidagi muvozanat ta’minlanmasa, go‘sht narxlariga tushayotgan bosim yaqin oylarda ham saqlanib qolishi mumkin.
“Zamin”ni Telegramʻda oʻqing!
