Germaniya kantsleri Putinning asl maqsadi nima ekanini ochiqladi

^{Olaf Sholts 2021 yil 8 dekabrdan kantsler vazifasida faoliyat yuritmoqda.
Foto: AP}
Rossiyaning Ukrainaga bostirib kirishi Germaniyaning tashqi hamda xavfsizlik siyosatida tub burilish yasadi. Kantsler Olaf Sholtsning kuni kecha Bundestag – mamlakat parlamentida soʻzlagan pafosli nutqi ana shundan dalolat bermoqda.

Germaniya etakchisi Rossiya qurolli kuchlarining Ukraina hududiga bostirib kirishini Evropa qit'asi tarixidagi evrilish pallasi deb atagan.

«Rossiya prezidenti Putin Ukrainaga hujumni boshlar ekan, sovuqqonlik bilan vayronkor urush gulxanini yoqdi. Buning sababi bitta: ukrainaliklarning hurligi uning mustabid hokimiyatini shubha ostiga olar edi. Bu – xalqaro huquqning poymol etilishi. Bu – hech bir asosda oqlab boʻlmaydigan xatti-harakat», – dedi kantsler Sholts.

«Putin Ukrainaga hamla qilar ekan, mustaqil davlatni dunyo xaritasidan oʻchirishnigina koʻzlagani yoʻq. Bu bilan u yarim asr avval Xelsinki yakunlovchi akti qabul qilinganidan buyon amal qilib kelayotgan Evropada xavfsizlik tartib-qoidalarini ham yoʻqqa chiqarmoqchi», – qoʻshimcha qilgan Germaniya kantsleri.

AQSh prezidenti Jo Bayden Rossiya qoʻshini Ukrainaga bostirib kirishi ortidan bergan bayonotida Putin bu bilan cheklanmasligi, u Sovet Ittifoqini tiklashga urinayotganini ta'kidlagan edi.

Olmon hukumati rahbari ham okeanortidagi ittifoqchisiga mushtarak fikr bildirgan.

«Putinning tarixiy mavzudagi maqolalarini oʻqigan, Ukrainaga qarshi ochiq urush e'lon qilganini televizorda koʻrgan yoki men kabi yaqinda u bilan shaxsan uchrashib, bir necha soat suhbatlashgan kishi Putinning Rossiya imperiyasini tiklashni koʻzlaganiga shubha qilmaydi», – deydi O.Sholts.

Germaniya etakchisi Ukrainada xunrezlik davom etayotgan pallada zudlik bilan amalga oshirilishi kerak boʻlgan muhim vazifalarga e'tibor qaratgan.

Birinchidan, butun dunyo, jumladan, Evropa Ukrainani hozirgi mushkul pallada qoʻllab-quvvatlamogʻi lozim. Kievga moddiy-ma'naviy koʻmak koʻrsatib kelayotgan Berlin qurol-aslaha etkazish soʻrovini javobsiz qoldirayotgan edi. Ammo Ukraina tajovuz ostida qolgach, Germaniya hukumati favqulodda choraga qoʻl urdi: Kievga mudofaa maqsadida qurol-aslaha yuboriladigan boʻldi. Qolaversa, Rossiya rahbariyatini urush qaroridan qaytarish uchun EI misli koʻrilmagan sanktsiyalar qoʻllamoqda.

^{Berlinda Rossiyaning Ukrainaga qoʻshin tortib kirishiga qarshi oʻtkazilgan koʻp ming kishili namoyishdan lavha. Foto: dpa}
«Xomxayolga berilmaymiz, albatta, Putin sanoqli soatlarda oʻz siyosiy maslagidan voz kechmaydi. Lekin Rossiya rahbariyati juda qisqa fursatda qanchalik ogʻir tovon toʻlashi kerakligini tushunib etishi aniq. Birgina oʻtgan haftada Rossiya birjasida narx qulashi 30 foizni tashkil etdi. Bu esa sanktsiyalarimiz oʻz kuchini koʻrsatayotganini tasdiqlaydi», – deydi O.Sholts.

Germaniya rahbari Rossiya urushni zudlik bilan toʻxtatmas ekan, yanada ogʻir iqtisodiy-moliyaviy jazo choralar kuchga kirishidan ogohlantirgan.

Kantsler Sholts Rossiya armiyasining Evropaga tahdid solishiga aslo yoʻl qoʻyilmasligini ta'kidlar ekan, Germaniya NATO doirasidagi majburiyatlarini ogʻishmay bajarishini urgʻulagan.

«Prezident Putin shubha qilmasinki, biz ittifoqchilarimiz bilan alyansning har bir qarich erini sabot ila himoya qilamiz», – deydi u.

Olmon hukumati boshligʻi oshib borayotgan tahdidlar sharoitida demokratik qadriyatlarni himoya qilish uchun mamlakat mudofaasiga koʻproq mablagʻ ajratish zaruratini ham asoslagan.

Avval xabar berganimizdek, joriy yil 15 fevral kuni O.Sholts Moskvada V.Putin uchrashib, Kreml etakchisini urushning Rossiya uchun ogʻir oqibatlaridan ogohlantirgan, xunrezlikka aslo yoʻl qoʻyib boʻlmasligini uqtirgan edi.

Ammo mutaraqqiy dunyo etakchilarining urinishlari besamar ketdi. Ogohlantirishlarga qaramay, Rossiya askarining qadami Ukraina tuprogʻiga etdi.

Eslatib oʻtamiz, Putin Ukrainaga tegishli Donetsk va Lugansk viloyatlari hududini mustaqil respublika sifatida tan olishi ortidan kantsler Sholts «Shimoliy oqim–2» loyihasiga sertifikat berish jarayonini «muzlatib» qoʻygan edi. Shu tariqa Kremlning geosiyosiy da'vosi sabab Rossiya gʻaznasidan milliardlab dollar sarflangan yirik loyiha ham yoʻqqa chiqdi.

“Zamin” yangiliklarini “Telegram”da kuzatib boring