Qarshining «Nasaf» klubi 2026 yilgi mavsumni kuchli tarkib bilan qarshi olish niyatida seleksiya ishlarini ancha erta boshlab yubordi. Jamoa rahbariyati yangi yilda raqobatbardosh qo‘shilmalar qilishni maqsad qilib, tarkibda jiddiy o‘zgarishlar amalga oshirishga tayyorlanmoqda.
Ayni paytda ma’lum bo‘lishicha, klub qator tajribali o‘yinchilar bilan xayrlashishni rejalashtiryapti. Dragan Cheran boshchiligidagi bir nechta legionerlar jamoani tark etishi kutilmoqda. Ular o‘rnini esa yangi nomzodlar bilan to‘ldirish bo‘yicha muzokaralar boshlangan.
Eng qizig‘i – «Nasaf» Samarqandning «Dinamo» klubidan ikki yetakchi o‘yinchiga ko‘z tikkan. Gap Anvarjon Hojimirzayev va Ratinio haqida ketmoqda.
Hojimirzayev Pro Ligadagi faoliyatidan keyin ikki mavsum mobaynida «Dinamo»ning asosiy yuziga aylandi va jamoaning ko‘plab muhim o‘yinlarida hal qiluvchi rol o‘ynadi. Ratinio esa Braziliya quyi ligasiga oid tajribasiga qaramay, Vadim Abramov qo‘li ostida Superliganing eng ishonchli tayanch yarimhimoyachilari qatoridan joy oldi. Har ikki futbolchi ham o‘tgan mavsum PFL tomonidan Superliganing yil ramziy jamoasiga kiritilgan edi.
Ularning «Dinamo» bilan amaldagi shartnomalari 2025-yilning yakuniga qadar amal qiladi. Demak, mavsum tugagach, ular erkin agentga aylanadi va «Nasaf» ularni bepul ravishda o‘z safiga qo‘shib olish imkoniga ega bo‘ladi.
Qarshi klubining bu harakatlari jamoa yangi mavsumda faqat yuqori marralar uchun kurashish niyatini ochiq belgilab turibdi. Muxlislar esa «ajdarlar» tarkibida qanday yangilanishlar bo‘lishini qiziqish bilan kutmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
