A Seriyaning 18-turida «Milan» safarda «Kalyari»ni 1:0 hisobida mag‘lub etdi. Uchrashuv taqdirini ikkinchi bo‘lim boshida Rafae'l Leau urgan gol hal qildi. Bu haqda kursiv.uz xabar beradi.
Bahs avvalida jamoalar ehtiyotkor futbolni tanladi: maydon markazida nazorat va pozitsion hujumlar ustuvor bo‘ldi. «Kalyari» ko‘proq qanotlardan foydalanishga urinib ko‘rdi, biroq yakunlovchi bosqichda o‘tkirlik yetishmadi. «Milan» to‘pni ko‘proq ushlab turganiga qaramay, hujumlarni zarbaga olib borish borasida unchalik sermahsul bo‘lmadi. Eng xavfli vaziyatlar asosan standart holatlardan keyin yuzaga kelib, tanaffusga qadar hisob ochilmadi.
Ikkinchi bo‘limda mehmonlar tezlikni oshirdi va 51-daqiqada uchrashuvdagi asosiy epizod ro‘y berdi. Fofana hujumni boshlab berdi, Rabiot jarima maydoniga uzatma yo‘lladi, Leau esa yaqin burchakka aniq zarba bilan darvozani ishg‘ol etdi.
O‘tkazib yuborilgan goldan keyin «Kalyari» oldinga tashlanishga majbur bo‘ldi: mezbonlar ko‘proq havodagi uzatmalar, krosslar va standartlar orqali bosim qilishga urindi. «Rossonerilar» esa tartibli himoya va o‘yin tempini nazorat qilish orqali ustunlikni saqlab qoldi. Yakunda «Milan» hisobni ushlab qoldi, uchrashuv oxirlarida Pulisich hamda Fyullkrugning xavfli zarbalarini esa «Kalyari» darvozaboni Kaprile bartaraf etdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
