79 yoshli Fabio Kapello futbol olamidagi sukunatni buzib, navbatdagi balandparvoz fikrini bildirdi. Italiyalik mutaxassisning The Touchline’ga aytgan gaplari ijtimoiy tarmoqlarda chaqqon tarqalmoqda. Bu haqda euro-football.ru xabar beradi.
Kapelloning asosiy xulosasi shunday: Krishtianu Ronaldu — ulkan to‘purar va buyuk futbolchi, biroq unda Messi, Maradona yoki braziliyalik Ronaldo darajasidagi “tug‘ma daholik” yo‘q. Mutaxassis buni ochiq aytib, portugaliyalikda “geniylik” masalasida nol ko‘rayotganini ta’kidladi.
Kapello o‘z tajribasiga tayangan holda futbolchilarning ikki xil toifasini ajratdi: biri irodasi, jismoniy kuchi va mehnati bilan “imkonsiz”ni bajaradi, ikkinchisi esa to‘pni olishi bilan maydonda sehr boshlanadi.
Ronaldu 41 yoshda, Saudiya Arabistonida o‘ynab hamon ko‘p gol urmoqda, jismonan yosh ko‘rinadi. Uning kolleksiyasida beshta “Oltin to‘p” bor, ortida esa dunyoning eng yirik klublaridagi faoliyat turibdi — rezyume chinakam ta’sirli.
Ko‘pchilik bunday yoshda allaqachon futbolni tugatib, studiyada tahlilchi bo‘lib o‘tirgan bo‘lardi. Ronaldu esa hanuz o‘zini ayamay ishlaydi: ovqatlanish tartibi, tiklanish, mashg‘ulot — hammasi temir intizom.
Kapelloning aytishicha, Ronaldu “mashina”ga o‘xshaydi: tanasini sport ilmi darajasida mukammallashtirgan, turli masofalardan oyog‘i bilan ham, boshi bilan ham gol ura oladi. Biroq italiyalik murabbiy nazarida bularning barchasi — yillar davom etgan mehnat va o‘zini nazorat qilish natijasi, “daholik” esa boshqa tushuncha.
Kapello misol sifatida futbol tarixidagi daholarni eslatadi: Maradona o‘z maydonidan to‘pni olib, raqiblarni birin-ketin aldab o‘tib ketardi; Ronaldo himoyachilar anglab ulgurmasidan yo‘nalishni o‘zgartirib, vaziyatni golga aylantirardi; Messi esa maydonni go‘yo shaxmat taxtasidek ko‘rib, yuqori tezlikda eng nozik qarorlarni topa oladi.
Kapelloga ko‘ra, Ronaldu hammasini o‘rganib, mashq qilib, sayqallab, o‘zini buyuk futbolchiga aylantirdi. Italiyalik mutaxassis portugaliyalikni yomon futbolchi demaydi, faqat uni maydonga chiqishi bilan “haqiqatni o‘zgartirib yuboradigan” tug‘ma daholar safiga qo‘shmaydi.
Ronaldu muxlislarini eng ko‘p ranjitadigan jihat ham shu: statistikani ko‘tarib chiqish, sovrinlar va rekordlarni sanash mumkin, ammo ayrim narsalar raqam bilan o‘lchanmaydi. Kapello aynan shu farq haqida gapirmoqda.
Uning fikricha, Ronaldu kutilgan gollarni juda yuqori saviyada bajaradi: havodagi kurash, zarba, pozitsiya tanlash — barchasi ideal. Ammo daholar esa tug‘ilgandan beriladigan, hech qaysi zalda sotib olib bo‘lmaydigan fazilatga ega bo‘ladi.
Albatta, endi bahslar avj oladi: muxlislar Chempionlar Ligasi kuboklari, gol rekordlari, Yevropadagi grand klublardagi faoliyatni dalil qiladi. Bularning hammasi rost, lekin Kapello boshqa mezon — “buyuklik” bilan “daholik” orasidagi chiziqni ta’kidlamoqda.
Kapelloning ortida katta murabbiylik tajribasi bor va u aytgan gaplar ko‘pchilikka yoqmasligi mumkin. Shunga qaramay, italiyalik mutaxassisning fikri futbol muhokamalarida yana bir bor “Ronaldu va Messi” mavzusini qizitib yubordi.
“Zamin”ni Telegramʻda oʻqing!
