Rossiya futboli sobiq yulduzi Aleksandr Mostovoy mart oyida Rossiya va Mali terma jamoalari o‘rtasida o‘tishi mumkin bo‘lgan o‘rtoqlik uchrashuvi haqida fikr bildirdi. Bu haqda euro-football.ru xabar beradi.
Rossiya futbol ittifoqi hozircha Mali bilan o‘yin rasman e’lon qilmagan, biroq Mali futbol federatsiyasi vakillari kelishuv borligini aytib o‘tgan. Ma’lumotlarga ko‘ra, uchrashuv 27 mart, juma kuni Krasnodarda bo‘lib o‘tadi.
Mostovoyning qayd etishicha, Rossiya termasi raqiblari darajasi sezilarli kuchaygan: avval Nigeriya, Peru, Chili, endi esa Mali. U shoshilinch xulosa chiqarishdan ko‘ra, yig‘inga asosiy futbolchilar keladimi-yo‘qmi, shuni ko‘rish muhimligini ta’kidladi. Shuningdek, u endi "savdo markazlari" darajasidagi raqiblarga qarshi emas, ancha jiddiy jamoalar bilan o‘ynalayotgani ijobiy ekanini aytdi.
Rossiya terma jamoasi so‘nggi yig‘inni noyabrda o‘tkazgandi: Valeriy Karpin boshchiligidagi jamoa Peru bilan 1:1 hisobida durang o‘ynab, Chiliga 0:2 hisobida yutqazgan. Sanksiyalar sabab Rossiya termasi hozircha rasmiy xalqaro turnirlarda qatnashmayapti.
“Zamin”ni Telegramʻda oʻqing!
